دارىگەرلەرگە ارنالعان ەڭ تازا قالتا تەلەفونى شىعارىلادى

استانا. قازاقپارات - ۇيالى تەلەفوندار بويىنا كىردىڭ ەڭ كوپ جينالاتىنى بەلگىلى. وندا بىرنەشە مىڭداعان ميكروبتار قوزىپ جاتادى دەۋگە دە بولادى.

ال BlackBerry كومپانياسى بولسا، وسى ماسەلەنى شەشۋ جولىن تاۋىپتى، دەپ حابارلادى www.24.kz.

ول اۋرۋحاناداعى دارىگەرلەردىڭ قولدانۋىنا ارنالعان باكتەريالارعا قارسى تەلەفون شىعارماق. كومپانيانىڭ باس ديرەكتورى دجون چەن مەديكتەردىڭ بۇل تەلەفوندى زالالسىزداندىرۋعا از عانا ۋاقىت جۇمسايتىنىن ايتتى.

سۋررەي ۋنيۆەرسيتەتىنىڭ زەرتتەۋىنە سايكەس، قالتا تەلەفونىنىڭ كورپۋسىنا قوناتىن ميكروبتار نەگىزىنەن زيانسىز، ءبىراق كەيدە التىن ستافيلوكوكك ءتارىزدى قاۋىپتىلەرى دە قۇرىلعى بەتىنە قونۋى مۇمكىن ەكەن.

جالپى دارىگەرلەر ءۇشىن مىناداي ەرەجە بار: ولار ناۋقاستىڭ پالاتاسىنا كىرگەنگە دەيىن جانە ودان شىققاننان سوڭ ءموبيلدى قۇرىلعىلارىن سپيرتتەلگەن مايلىقپەن ءسۇرتۋى ءتيىس. وسى رەتتە جاڭا ونەرتابىس اق حالاتتىلاردىڭ ۋاقىتىن ۇنەمدەيدى، دەپ جازادى MedDaily.ru.