تولە مەن قازىبەك، ايتەكە ۇشەۋى نيۋ-يوركتى ءسۇيسىندىردى

استانا. قازاقپارات - تاۋەلسىز قازاقستان تاريحىندا دۇنيەگە كەلگەن تۇڭعىش ۇشەمدەر قازاقستاندىقتاردىڭ ەسىندە بولار.

ولارعا - تولە، قازىبەك، ايتەكە دەپ، ءۇش ءبيدىڭ ەسىمدەرىن قويعان دا ەلباسىنىڭ ءوزى بولاتىن.

بۇگىندە ۇشەمدەر ەرجەتتى. قىركۇيەك ايىندا 17 جاسقا تولاتىن ولار وزدەرىن استانا قالاسىنىڭ قۇرداسىمىز دەپ ەسەپتەيدى. تاۋەلسىز ەلىمىزدىڭ «ءۇش ءبيى» امەريكالىقتاردىڭ دا نازارىن وزدەرىنە اۋدارتىپ، قازاقتىڭ ۇشەمىنە نيۋ-يورك حالقى سۇيسىنۋدە. بۇل تۋرالى khabar.kz جازادى.

تۋعاننان باستاپ، وسى ۋاقىتقا دەيىن ۇشەمدەردىڭ ءومىرى جۇرت نازارىندا بولدى. دۇنيەگە ۇشەم كەلگەنىن ەستىگەندە ۇشەمدەردى كورۋگە پەرزەنتحاناعا سول كەزدەگى ءبىلىم، مادەنيەت جانە دەنساۋلىق ساقتاۋ ءمينيسترى قىرىمبەك كوشەربايەۆتىڭ ءوزى ارنايى بارىپ، ەلباسىنىڭ قۇتتىقتاۋىن جەتكىزگەن بولاتىن.

ال تولە، ايتەكە مەن قازىبەك ءۇش جاسقا تولعاندا اكەسى يسرايل تىلەگەن ديپلوماتيالىق قىزمەت بابىمەن لوندونعا اۋىسىپ، ۇشەمدەر اعىلشىن ءتىلدى ورتادا ءوستى. اكەسىنىڭ ديپلوماتيالىق قىزمەتىنە بايلانىستى شەتەلدە تۇرىپ، وتانىنان جىراقتا وسكەن ۇشەمدەر بەس جىلدان بەرى نيۋ-يورك قالاسىندا. الايدا ولار تۋعان ەلدەن الىستا جۇرسە دە حالقىنىڭ تاريحىن جاقسى بىلەدى. قازاقتىڭ ءۇش ءبيىنىڭ قۇرمەتىنە قويىلعان ءوز ەسىمدەرىمەن ماقتانادى.

 -  مەنىڭ ەسىمىم -  تولە. مەن قازىبەكتەن 10 مينۋت، ال ايتەكەدەن 15 مينۋت بۇرىن دۇنيەگە كەلگەنمىن، - دەيدى ۇشەمدەردىڭ ۇلكەنى. ءبىز ەسىمدەرىمىزدى ماقتان تۇتامىز. ويتكەنى، ءبىزدىڭ ەسىمىمىزدى ەلباسىنىڭ ءوزى قويعان. ءبىز دە كەلەشەكتە قازاقتىڭ دانىشپان ءۇش ءبيى -  تولە، ايتەكە مەن قازىبەك بيلەردىڭ جولىن قۋىپ، ەل يگىلىگى ءۇشىن قىزمەت اتقارساق دەيمىز. ەشقاشان ءوز اتىمىزعا ءسوز كەلتىرمەيمىز دەگەن سەنىمدەمىن.

ۇشەمدەر بۇگىندە نيۋ- يوركتەگى امەريكاندىق مەكتەپتە ءبىلىم الۋدا. ساباقتان كەيىن ولار وزدەرى جازىلعان سپورت سەكتسياسىنا قاتىسادى.

 -  ءبىز ا ق ش-تا تۇرىپ جاتقان بەس جىلدا امەريكانىڭ ءبىراز قالالارىن ارالادىق. الايدا وسى ۋاقىتقا دەيىن امەريكادا ءوزىمىز سەكىلدى ۇشەمدەردى كەزدەستىرگەنىمىز جوق. ءبىراق ءبىز كوپتەگەن ەگىزدەردى بىلەمىز. مەكتەپتەگى دوستارىمىز ءبىزدى كورگەندە قاتتى تاڭىرقاعان ەدى. ولار ءوزارا ءبىر- بىرىنە: «قاراڭدار، ۇشەمدەر، ءبىر- بىرىنەن اينىمايدى!» دەپ جاتتى، - دەپ ەسىنە الادى ايتەكە.

ءتىپتى قازاقستاندىق ۇشەمدەردى مەكتەپتەگى مۇعالىمدەر دە ءبىر-بىرىنەن ايىرا المايدى ەكەن. اسىرەسە، ولار ءۇشىن قازىبەك پەن تولەنى ءبىر-بىرىنەن اجىراتۋ قيىن كورىنەدى. ال سىنىپتاستارى ولاردىڭ ساباققا بەلسەندى قاتىسىپ، سپورتقا دەگەن قىزىعۋشىلىقتارىنىڭ باسىم ەكەنىن ايتادى.

 -  ولار ساباققا وتە بەلسەندى قاتىسادى. سۋدا جاقسى جۇزەدى، سۋرەت تە سالا الادى. ولار بىردەن مەكتەپتىڭ فۋتبول كومانداسىنا قابىلداندى. اعايىندى سىنىپتاستارىمنىڭ ارقاسىندا مەن قازاقستان تۋرالى كوپ اقپارات ءبىلدىم، - دەيدى ولاردىڭ سىنىپتاسى تەيلور ليەۆيس.

ۇشەمدەر بولاشاق ماماندىعىن دا تاڭداپ ۇلگەرىپتى. تولە كەلەشەكتە حيرۋرگ بولۋدى ارمانداسا، قازىبەك ارحيتەكتور نەمەسە زاڭگەر بولعىسى كەلەدى. ال ايتەكە زامان تالابىنا ساي كومپيۋتەردى جەتىك مەڭگەرگەن باعدارلاماشى بولسام دەيدى...

ۇنەمى ەلدەن ەلگە، قالادان قالاعا كوشىپ ۇيرەنگەن تىلەگەندەر وتباسى ءقازىر جۇكتەرىن جيناپ، جولعا شىعۋعا دايىن وتىر. الايدا ولار اتامەكەنگە قايتۋعا اسىعار ەمەس. اكەسىنىڭ قىزمەت بابىمەن بۇل جولى ۇشەمدەر وتباسى كۋباعا اتتانادى.

aynaline.kz