ن. مۇحامەدجانوۆا: «تازا قازاق تىلىندەگى باعدارلامالاردى جۇرت كورمەيدى» دەگەن تەرىس تۇسىنىكتىڭ تاس-تالقانىن شىعاردىق

- نۇرجان جالاۋ قىزى، «قازاقستان» ۇلتتىق ارناسىنىڭ ءدال قازىرگى تاڭداعى تىلگە تيەك ەتەرلىك تابىستى كورسەتكىشتەرىن اتاپ وتسەڭىز.

 -  ۇلتتىق ارنا - قازاق تەلەۆيزياسى مەن راديوسىنىڭ قارا شاڭىراعى. بۇل جەردە ۇلتىمىزدىڭ ۇلى پەرزەنتتەرى ەڭبەك ەتكەن. ءبىزدىڭ ماقساتىمىز - قازاق جۋرناليستيكاسىنىڭ مايتالماندارى قادىرلى كامال سمايىلوۆ، شەرحان مۇرتازا، ساعات اشىمبايەۆ سىندى اعالارىمىز قالدىرعان ادەمى ءداستۇردى جالعاستىرۋ، ەلىمىز ءۇشىن ادال ەڭبەك ەتۋ.

«قازاقستان» تەلەارناسىن تولىقتاي مەملەكەتتىك تىلدە حابار تاراتۋعا كوشىرۋ ەلباسىنىڭ تاپسىرماسىمەن، حالىقتىڭ قولداۋىمەن 2011 -جىلى جۇزەگە استى. ماعان وسى ءبىر تاريحي ءارى اسا جاۋاپتى كەزەڭدە ۇجىمدى باسقارۋ مارتەبەسى بۇيىردى. بۇل ۇلكەن سىن ەدى.

بۇگىندە «تازا قازاق تىلىندەگى باعدارلامالاردى جۇرت كورمەيدى» دەگەن تەرىس تۇسىنىكتىڭ تاس-تالقانىن شىعاردىق دەسەم ارتىق ايتپايمىن. رەيتينگ بويىنشا سوڭعى ءۇش جىلدان استام ۋاقىتتا الدىڭعى ورىندامىز. بۇل مەنىڭ عانا ەمەس، نامىسقا تىرىسقان ءبىزدىڭ ۇلكەن شىعارماشىلىق ۇجىمنىڭ جەڭىسى. وسى ۋاقىت ارالىعىندا كورەرمەندەر سانى ەكى ەسە كوبەيدى. بۇدان باسقا، تەلەارنا حابار تاراتۋدىڭ جالپى كولەمىنەن %87 دى قۇرايتىن ءوز جوبالارىنىڭ ءوندىرىسى بويىنشا دا الدىڭعى قاتارعا شىقتى.

بۇگىنگى كۇنى ەرلىكتەرىنەن قازاقستاندىقتار ۇلگى الاتىن شىنايى ادامدار مەن قاھارمانداردىڭ ءومىرى تۋرالى ايتىلاتىن الەۋمەتتىك تاقىرىپقا باعىتتالعان جوبالارعا جانە توك-شوۋلارعا كوپ كوڭىل بولىنۋدە. كورەرمەندەردىڭ ابستراكتىلى باعدارلامالارعا قىزىعۋشىلىعى جوق ەكەنى بەلگىلى. شىنىن ايتساق، كورەرمەندەرىمىز ارزان شەتەلدىك قايتالاۋلاردان شارشاعانىن تۇسىندىك. ءوز تاريحىمىزعا، مادەنيەتىمىزگە، داستۇرلەرىمىزگە ۇڭىلۋگە بەت بۇردىق. بۇل ءوز ءوندىرىسىمىزدىڭ ساپالى جاڭا باعدارلامالارىن جاساۋعا يتەرمەلەيدى. ءبىزدىڭ تەلەارنا تەلەكورەرمەندەردىڭ بارلىق وزگەرىستەرى مەن قالاۋلارىنا بىردەن جاۋاپ بەرۋگە تىرىسادى.

ياعني «قازاقستان» امبەباپ تەلەارناعا اينالىپ وتىر. ءبىز ءتۇرلى جانرداعى ءونىمدى ۇسىنامىز. «قازاقستان» بىرىكتىرەتىن ارنا. تانىمدىق، ويىن-ساۋىق، تالداۋ، تاريحي، جاڭالىقتار، بيزنەس جوبالار - مۇنىڭ بارلىعى باعدارلامالىق كەستەنىڭ نەگىزىنە الىنىپ، تەلەكورەرمەندەردىڭ كوڭىلىنەن شىعۋدا. بۇگىنگى كۇنى تۇتىنۋشىنىڭ قىزىعۋشىلىعىن قاناعاتتاندىرۋ وڭاي شارۋا ەمەس، كورەرمەن اسا تالعامپاز، تالاپتى. ساندىق تەحنولوگيالار دامىعان زاماندا اقپارات الۋ كوزدەرى كوبەيىپ كەلەدى. بۇل رەتتە، اۋديتوريانى ۇستاپ قالۋعا دەگەن كۇرەس ءوزارا باسەكەلەستىكتى ودان ءارى كۇشەيتەدى.

جاھاندانۋدىڭ اسقان ۇدەرىسىنە قاراماستان، جۇمىس كۇنى اياقتالعاننان كەيىن بۇرىنعى كەزدەردەگىدەي وتباسىڭمەن تەلەديداردىڭ الدىندا دەمالعىڭ كەلەدى. تەلەارنالاردى قاراپ وتىرىپ، ادامدار وزدەرىنە جاقىن نارسەنى ىزدەيدى، ءوز مەملەكەتىندەگى، قالاسىنداعى، اۋىلىنداعى جاڭالىقتاردى بىلگىسى كەلەدى. بۇل وزگە مەملەكەتتەردە، باسقا كونتينەنتتەردە بولىپ جاتقان وقيعالاردان الدەقايدا قىزىقتى ەكەنى ايتپاسا دا تۇسىنىكتى.

 ءبىزدىڭ باعدارلامالارىمىزدىڭ رەيتينگتەرىن «تنس گەللاپ» كومپانياسى زەرتتەپ، تالداۋ جاسايدى. مەديازەرتتەۋ جۇرگىزۋ بۇل الەمدىك تاجىريبە. زەرتتەۋ دەرەكتەرىنە سايكەس، 2014 -جىلدىڭ قورىتىندىسى بويىنشا، 6+ (قاز) اۋديتورياسىندا «قازاقستان» تەلەارناسىنىڭ ورتا تاۋلىكتىك ۇلەسى %17,7 دى قۇرادى. وسىلايشا، قازاق ءتىلدى باعدارلامالاردى كورۋ كورسەتكىشى بويىنشا تەلەارنا تەلەنارىققا قاتىسۋشىلاردىڭ اراسىندا جەتەكشى پوزيتسيانى يەلەندى. كورپوراتسيا 100 مىڭنان از تۇرعىندار سانى بار ەلدى مەكەندەردە دە ءبىرىنشى ورىندا تۇر.

- ارنانىڭ تەحنيكالىق جاراقتاندىرىلۋ دەڭگەيىن باسشى جانە كاسىبي جۋرناليست رەتىندە قالاي باعالايسىز؟ كاسىبي ۇشقىرلىق ءۇشىن وقيعا ورنىنا سول مەزەتتە جەتۋگە مۇمكىندىك بەرەتىن تىكۇشاق الۋ جوسپارلارىڭىزدا بار ما؟

- كورپوراتسيا قۇرامىنا ەنشىلەس تەلەارنالار، راديولار مەن ايماقتاعى فيليلالداردى تەحنيكالىق قامتاماسىزداندىرۋ، ماتەريالدىق بازاسىن نىعايتۋ، 3G، 4G جەلىسى ارقىلى تىكەلەي ەفيردە كورسەتۋ تاجىريبەسىن كۇشەيتۋ جۇمىستارى باستى نازاردا. وتكەن جىلدىڭ وزىندە بىرنەشە ميلليون تەڭگەنىڭ جابدىقتارى ساتىپ الىنىپ، بىرنەشە ءىرى تەلەكوپىر ۇيىمداستىرىلىپ، وتكىزىلدى. ءبىز جەر-جەردە HD- فورماتتا حابار تاراتۋعا كوشۋدى قامتاماسىز ەتۋىمىز قاجەت، ول ءۇشىن تەحنيكالىق اۋىسىمعا نەگىز جاسالۋى قاجەت. الايدا بۇل سالاعا قاجەتتى تەحنيكالىق ماماندار تاپشى ەكەندىگى تاعى بار. بۇل ماسەلەلەر ۇكىمەت دەڭگەيىندە شەشىمىن تابادى دەگەن سەنىمدەمىز.

ءوزىمىزدىڭ تىكۇشاعىمىز بولماعانىمەن، توتەنشە جاعدايلار جونىندەگى ۆەدومستۆومەن قول جەتكىزگەن كەلىسىم بويىنشا، قاجەت بولعان جاعدايدا توتەنشە وقيعا ورىن العان جەرگە تەز ارادا جەتۋگە مۇمكىندىك بار.

- ۇلتتىق تەلەجۋرناليستيكانىڭ كورنەكتى تۇلعاسى ساعات اشىمبايەۆ جۇرگىزگەن «ادەپتەن وزبايىق!» تەلەديسپۋتى، «قارىز پەن پارىز» باعدارلاماسى، سول كەزدەرى قازاق كورەرمەندەرىنىڭ كوزايىمىنا اينالعان «قىمىزحانا»، «التىباقان» ءبارى دەرلىك ءتولتۋما دۇنيەلەر ەدى. قازىرگى ۇلتتىق ارنا باعدارلامالارىنىڭ قانشا پايىزى كوشىرمە، قانشا پايىزى ءتۇپنۇسقا؟

- «قىمىزحانانى» جانە تاعى دا باسقا باعدارلامالاردى سول قالپىندا قايتا شىعارۋدىڭ قاجەتى جوق بولار. ولار كەزىندە ءوزىنىڭ مىندەتىن تولىق اتقاردى عوي. قازىرگى تاڭدا ۋاقىت تالابىنا ساي جاڭا تىڭ جوبالار دۇنيەگە كەلۋدە. باسىندا ايتىپ وتكەنىمدەي، «قازاقستان» تەلەارناسى حابار تاراتۋدىڭ جالپى كولەمىنەن %87 دى قۇرايتىن ءوز جوبالارىنىڭ ءوندىرىسى بويىنشا الدىڭعى قاتاردا كەلەدى.

«قازاقستان» تەلەارناسىنىڭ قورجىنىندا ءدال بۇگىنگە 100 گە جۋىق تەلەجوبالارى مەن 40 تان استام تاقىرىپتىق باعىتتى قامتىعان 900 بولىمدىك تەلەحيكايالار ءتۇسىرىلدى. وتباسىلىق قۇندىلىقتاردى ناسيحاتتايتىن «قارا شاڭىراق»، قىزىق تا قيىن وقيعالارعا تولى «جەدەل جاردەم»، «ۇستاز»، «كوك تارلاندارى»، «سىرعالىم» جانە تاعى باسقا دا وتاندىق تەلەحيكايالارىمىزدىڭ مىڭداعان كورەرمەندەردىڭ كوڭىلىنەن شىققانى ءبىز ءۇشىن ايرىقشا ماقتانىش ءارى مارتەبە. ارينە، تەلەۆيزيالىق ءونىمدى ءوندىرۋ مەن دايىن ءونىمدى ساتىپ الۋدىڭ اراسىندا ايىرماشىلىق بار. ەگەر بايقاعان بولساڭىز، ءبىزدىڭ تەلەارنامىز سوڭعى ەكى جىلدا تۇرىكتىڭ، كارىستىڭ سەريالدارىن ساتىپ المايدى. كەرىسىنشە، ءبىز وتاندىق ونىمگە ۇلكەن ءمان بەرۋدەمىز. كوركەم تەلەحيكايا ءونىمىن ءوندىرۋ شىنىندا دا ارزان دۇنيە ەمەس. كورەرمەندەرىمىزدىڭ كوڭىلىندە جۇرگەن سان الۋان ماسەلەلەردى كينو تىلىمەن جەتكىزۋ - ۇلكەن شارۋا. ەڭ باستىسى، وسكەلەڭ ۇرپاققا قانداي تاربيە بەرىپ جاتىرمىز؟ بۇل ماسەلە دە ءاردايىم نازارىمىزدا.

- تەلەجۇرگىزۋشى - كوگىلدىر ەكرانداعى كاسىبي تۇلعا. تەلەباعدارلاما جۇرگىزىپ جۇرگەن انشىلەردىڭ بارلىعى بىردەي سول مارتەبەگە لايىق پا؟ (ەگەر لايىق بولماسا ەفيرگە نەگە جىبەرىلەدى؟)

-  سىرت بەينە -  ادامنىڭ ىشكى جان دۇنيەسىنىڭ ايناسى. كەز كەلگەن ادام ايناعا قاراعان كەزدە ءبىرىنشى كەزەكتە ادەمىلىكتى، كورىكتىلىكتى ىزدەيدى. الايدا، سىرتقى كەلبەتىنە قاراپ قارسى الىنعان ادامنىڭ قالاي شىعارىپ سالىنۋى ونىڭ اقىلىنا بايلانىستى. تەلەارنادا دا سولاي. اجارى اشىق، كوركەم جاننىڭ كاسىبي دەڭگەيىنىڭ تومەندىگىن، ءبىلىم، بىلىگىنىڭ كەمشىندىگىن كورەرمەن كەشىرمەيدى.

سوندىقتان، كەز كەلگەن تەلەارنا باسشىسى تەلەجۇرگىزۋشى كوركىنىڭ اقىلىنا ساي بولۋىنا ايرىقشا ءمان بەرەدى. راس، ۇلتتىق ارنا جۇرگىزۋشىلەرىنە كوپتەگەن سىن ايتىلىپ جاتادى. ونىڭ نەگىزدىلىگىن مويىندايمىز دا. سەبەبى، ءاربىر جۋرناليستىڭ كاسىبي دەڭگەيى جوعارى تەلەجۇرگىزۋشى بولىپ قالىپتاسۋى ۇزاققا سوزىلاتىن ءۇردىس. وعان بەلگىلى ءبىر ۋاقىت كەرەك. ولار سول ەفيرگە شىققانعا دەيىن ءبىراز دايىندىقتان وتەدى. ەفيرگە شىعىپ جۇرگەننىڭ وزىندە دە ۇنەمى شەبەرلىگىن شىڭداۋمەن بولادى.

مىسالى، رەيتينگىسى جوعارى بولىپ تۇرعان «ايتۋعا وڭاي» باعدارلاماسىنىڭ جۇرگىزۋشىسى بەيسەن قۇرانبەكتىڭ قازىرگى دەڭگەيگە جەتۋىنە جىلدار كەرەك بولدى. ءوزى قاتارلى جۋرناليستەردىڭ اراسىندا تەلەجۇرگىزۋشىلىكتى يگەرگەن جالعىز وسى بەيسەن عانا. سول سەكىلدى «الاڭدى» جۇرگىزەتىن نۇرمۇحامەت بايعارا دا ۇلكەن شىڭدالۋ مەكتەبىنەن ءوتتى. سوندىقتان، مەنىڭ ويىمشا، تەلەجۇرگىزۋشى بولىپ قالىپتاسۋ ۋاقىتتى قاجەت ەتەدى.

 جالپى، جۇرگىزۋشىگە قويىلاتىن باستى تالاپ -  ول ءوزىن قاشاندا كورەرمەندەردەن، تىڭدارمانداردان بيىك ۇستاماي، ولارمەن تەڭ دارەجەدە بولۋى كەرەك. تەلەارنا الدىندا وتىرعان قاۋىمعا دەگەن قۇرمەتى ايرىقشا كورىنىپ تۇرۋى قاجەت. كەرىسىنشە جاعدايدا، جۇرتشىلىق ونى قابىلداي المايدى.

ءبىز نەگىزى تەلەجۇرگىزۋشىلەردى دايىنداۋعا ۇلكەن ءمان بەرەمىز. «قازاقستان» رەسپۋبليكالىق تەلەراديكورپوراتسياسى تالابى تاۋداي قازاق جىگىتتەرى مەن قىزدارىن جۇمىس ىستەپ، قالامىن ۇشتايمىن دەگەن قايراتتى جاستارعا ءارقاشان ەسىگىن ايقارا اشادى. ول ءۇشىن اراتۇرا ءتۇرلى جاڭالىقتار مەن باعدارلامالارعا قاجەت جۇرگىزۋشىلەرگە كاستينگ جاريالاپ، اراسىنان تالانتتى دەگەندەرىن ىرىكتەپ الامىز.

وزدەرىڭىز «قازاقستان» ۇلتتىق ارناسىنىڭ جۇرگىزۋشىلەرىنەن-اق بايقاپ وتىرعاندارىڭىزداي، دارىن يەلەرى، مىقتى كاسىبي جۋرناليستەر مەن تىلشىلەر بارشىلىق. قازاق جۋرناليستيكاسىنىڭ وسى زامانعى مەكتەبى مەن وزىندىك ءستيلى بىرتىندەپ قالىپتاسىپ كەلە جاتىر جانە بولاشاعى زور دەر ەدىم.

- باسقا سالادان كەلگەن مامانداردى قايتا دايارلاۋ كۋرسىن اشۋ قاجەت دەپ ەسەپتەيسىز بە؟ كەيبىر ەكونوميست، زاڭگەر، اسىرەسە، انشىلەر ەفير زاڭدىلىقتارىن بىلمەيدى، كەيدە كاسىبي ەتيكانى ساقتامايدى.

- بىزگە جۇمىسقا الىناتىن ءاربىر ادام 3 ايلىق سىناقتان وتەدى. سول سەبەپتى ولاردىڭ كاسىبي دەڭگەيى تومەن دەپ ايتپاس ەدىم. مىندەتتى تۇردە جوبادا جۇمىس ىستەيتىن ارىپتەستەرىمىزدىڭ كاسىبي دايىندىقتارىنا قاتاڭ ءمان بەرەتىن بولامىز.

شىنىندا دا، قازىر تەك جاقسى جۋرناليست بولۋ - از. تەلەۆيدەنيە سالاسىنا مىقتى مەنەدجەرلەر قاجەت. الەمدەگى وزىق تەحنولوگيالاردى، جاڭاشىل جوبالار مەن ۇردىستەردى تەز ارادا قابىلداپ، قولدانۋ ءۇشىن ءبىلىم جانە تاجىريبە بولۋ كەرەك. سوڭعى ەكى جىلدا كورپوراتسيادان وننان استام قىزمەتكەرلەر ەلباسىمىز ن. نازاربايەۆتىڭ «بولاشاق» حالىقارالىق باعدارلاماسى بويىنشا تەلەۆيزيا- راديو سالاسىندا شەت ەلدەرگە بارىپ، بىلىمدەرىن جەتىلدىرىپ كەلدى. ەندى بىرنەشە قىزمەتكەرلەر جاقىن كۇندەردە وقۋعا اتتانباق. مۇنىڭ بارلىعى قازاقستاندىق تەلەۆيزيا، راديو سالاسىنىڭ، ادامنىڭ كاسىبي دەڭىگەيىنىڭ وسۋىنە جاقسى نەگىز دەپ ايتار ەدىم.

جۋرناليستەردى بەلگىلى ءبىر سالاعا مامانداندىرىپ دايارلاۋ الەمدە بار ءۇردىس. بىزدە دە ماماندانعان جۋرناليستەر بار، ءبىراق از. بۇل ىسپەن جۋرناليستەر دايارلايتىن جوعارى وقۋ ورىندارى اينالىسۋى كەرەك.

- ۇلتتىق ارنانى الەمدىك دەڭگەيدەگى ارناعا اينالدىرۋ ءۇشىن قانداي ناقتى قادامدار جاسالۋدا؟

-  تەلەراديوكرپوراتسيانىڭ جۇمىسىن الەمدىك تالاپتارعا ساي ەتۋ ماقساتىمەن 2014 -جىلى «قازاقستان» ر ت ر ك ا ق ديرەكتورلار كەڭەسى جانىنداعى ەكسپەرتتىك- كونسۋلتاتيۆتىك كەڭەس قۇرىلىپ، ونىڭ I وتىرىسى بولدى. وعان بىلىكتى حالىقارالىق دەڭگەيدەگى ساراپشىلار - حالىقارالىق تەلەراديوتاراتۋشىلار اسسوتسياتسياسىنىڭ باس ديرەكتورى سايمون سپەنسۆيك، «رەسەي راديوسى» مەملەكەتتىك راديوتاراتۋشى كومپانياسىنىڭ ديرەكتورى ۆياچەسلاۆ ۋمانوۆسكيي مەن BBC Advertising ايماقتىق وكىلدىگىنىڭ باسشىسى سەرگەي ستانوۆكين قاتىسىپ، مەديا جانە كوممۋنيكاتسيالار سالاسىنا قاتىستى ءبىرقاتار ماسەلەلەر قارالىپ، تالقىعا سالىندى.

ونىڭ ىشىندە كەڭەس مۇشەلەرىمەن ءوزارا قارىم- قاتىناس ورناتۋ باعىتتارى، مەديا- اكتيۆتەردى باسقارۋ سالاسىنداعى حالىقارالىق تاجىريبەدەگى وزىق ۇلگىلەر، بيزنەس- ۇدەرىستەرىن جەتىلدىرۋ، تەحنيكالىق جانە اقپاراتتىق جاڭارتۋ مەن «قازاقستان» ر ت ر ك» ا ق قىزمەتكەرلەرىنىڭ بىلىكتىلىگىن ارتتىرۋ سۇراقتارى تالقىلاندى. مۇنىڭ بارلىعى ءبىزدىڭ جۇمىستى الەمدىك ستاندارتتارعا جاقىنداتۋدىڭ العاشقى قادامى دەپ ايتار ەدىم.

سونىمەن قاتار، كۇندەلىكتى جۇمىس بارىسىندا كومەككە جۇگىنەتىن كەڭەسشىلەرىمىز دە بار. ولاردىڭ اقىلىنان، تاجىريبەسىنەن كورەرمەندەر ۇتپاسا، ۇتىلمايدى. ولاردىڭ كەڭەسى تەلەەفيردىڭ ساپاسىن جاقسارتۋ ءۇشىن كەرەك. ال، ولاردىڭ جوبالار مەن باعدارلامالاردىڭ مازمۇنىنا ەش قاتىسى مەن ىقپالى بولعان ەمەس.

«قازاقستان» ر ت ر ك» ا ق جاس جۋرناليستەردىڭ كاسىبي بىلىكتىلىگىن ارتتىرىپ، الەمدىك دەڭگەيگە ءبىرسىپىرا جاقىنداتۋ ءۇشىن كورپوراتسيا ەسەبىنەن وتاندىق جانە شەتەلدىك ساراپشىلاردىڭ قاتىسۋىمەن وقىتۋ باعدارلامالارىن، سونداي-اق، تەلەراديو سالاسىنداعى وزىق تاجىريبەنى زەردەلەۋ ماقساتىندا الەمدەگى ۇزدىك تەلەراديكومپانيالارمەن ءوزارا ءىس- قيمىلدى جۇزەگە اسىرۋدا: ياعني تاعىلىمدادان ءوتۋ، ءىس تاجىريبەمەن الماسۋ شارالارى جۇيەلى تۇردە جۇزەگە اسىرىلادى. اتاپ ايتقاندا، 2013 -جىلى 449 قىزمەتكەر بىلىكتىلىگىن ارتتىرىپ، 7 قىزمەتكەر لوندون قالاسىندا BBC A كادەمياسىندا جانە 1 قىزمەتكەر موسكۆا قالاسىندا ۆ گ ت ر ك ۆيزارت ا ق ب تاعىلىمدامادان وتسە، 2014 -جىلى 334 قىزمەتكەر وقۋ كۋرستارىنا قاتىسىپ، نيۋ-يورك كينو ونەرى اكادەمياسىندا 2 قىزمەتكەر تاعىلىمدامادان ءوتتى، 6 قىزمەتكەر Russia Today تەلەكومپانياسىندا ءىس تاجىريبەدەن ءوتتى.

- الداعى ۋاقىتتا ۇلتتىق ارنا كورەرمەندەرىن قانداي جاڭا تەلەجوبالار كۇتىپ تۇر؟ ولار نەسىمەن ەرەكشەلەنەدى؟

- ءبىز تەلەۆيزيا سالاسى بولعاندىقتان، ءبىر كۇن دە كىدىرىس جوق. ءوزىمىزدىڭ جوسپارلارىمىزدان باسقا، زامان، ۋاقىت، قوعامنىڭ دا سۇرانىس- تالاپتارى بولادى، سوعان دا يكەمدەلەمىز، ىڭعايلانامىز. كۇتپەگەن جەردەن تىڭ جوبالار دۇنيەگە كەلىپ جاتقان ساتتەر بىزدە وتە كوپ.

 جوسپار مەن ماقسات-باعدار كوپ، ول الداعى ۋاقىتتىڭ ەنشىسىندە. وسى قازىر ءبىز ناۋرىز مەيرامىنا، جەڭىستىڭ 70 جىلدىعىنا قاتىستى مەرەكەلىك جوبالارعا باسا نازار اۋدارۋدامىز. ول جايلى تەلەديدارىمىزدان كورىپ- بىلە الاسىزدار.

الداعى ۋاقىتتا دا تاريحي درامالار مەن شىتىرمان وقيعادلارعا تولى وتاندىق تەلەونىمدەردى دە مولىنان ۇسىناتىن بولامىز.

ال، جالپى، وسى جىلدار ىشىندە «قازاقستان» تەلەراديوكورپوراتسياسىندا اۋىزبىرلىگى مىقتى كوماندا قالىپتاسىپ ۇلگەردى. نارىقتاعى پوزيتسيالارىمىزدى نىعايتۋعا باعىتتالعان بارلىق باستامالارىمىز ويداعىداي ءىس جۇزىنە اسۋدا. سوڭعى جىلدارى تەلەارناعا ەڭ ۇزدىك جانە يننوۆاتسيالىق جاڭالىقتار، ونىڭ ىشىندە، تەحنولوگيالارى مەن كونتەنتتەردى مولىنان ەنگىزۋدەمىز. تىڭ جانە العىر يدەيالاردى ءىس جۇزىنە اسىرۋعا قولعابىس جاساعان ۇلكەن شىعارماشىلىق توپقا مەنىڭ ايتار العىسىم شەكسىز. كورپوراتسيانىڭ الداعى ۋاقىتتا دامۋىنا قاتىستى ۇزاق مەرزىمدى دامۋ ستراتەگياسى ازىرلەنىپ، قابىلداندى. بۇگىنگى تاڭداعى ءبىزدىڭ جوعارى رەيتينگتى باعدارلامالارىمىز الىنعان بەتبۇرىستىڭ دۇرىس ەكەندىگىن دالەلدەپ وتىر. سايىپ كەلگەندە، ءبىزدىڭ ءاربىر جاساعان قادامىمىز وزىندىك تەلەونىم ءوندىرۋ ارقىلى جاڭا كورەرمەندەر اۋديتورياسىن تارتۋعا نەگىزدەلىپ وتىر. ال، بۇل ءبىزدىڭ تەلەنارىقتا كوشباسشى بولىپ قالۋىمىزبەن قاتار، ونى ودان ءارى نىعايتۋ جولىنداعى باتىل قادامىمىز بولماق.

- اڭگىمەڭىزگە كوپ راحمەت! ىستەرىڭىزگە ساتتىلىك تىلەيمىز.

سۇحباتتاسقان جيدەگۇل ءابدىجادىل قىزى

Alashainasy.kz