استانادا تۇركى الەمى عىلىم اكادەميالارى وداعى قۇرىلدى
قۇرىلتاي جۇمىسىنا قاتىسقان ازەربايجان، قازاقستان، قىرعىزستان، تۇركيا، تاتارستان، باشقۇرتستان ۇلتتىق اكادەميالارىنىڭ باسشىلارى تۇركى الەمى عىلىم اكادەميالارى وداعىن قۇرۋ تۋرالى باس قۇجاتقا قول قويدى.
حالىقارالىق تۇركى اكادەمياسىنىڭ ۇيىمداستىرۋىمەن وتكەن باسقوسۋدا وداقتىڭ جۇمىسىن رەتتەيتىن ەرەجە بەكىتىلىپ، ونىڭ ءتوراعاسى سايلاندى جانە كەلەسى جيىن وتەتىن ورىن انىقتالىپ، العاشقى حاتتاماعا قول قويىلدى.
«ءبىزدىڭ بابالارىمىز بۇرىنعى زامانداردان بەرى تۇركى حالىقتارىنىڭ بىرلىگىن اڭساعان. وسى بىرلىكتىڭ ءبىرىنشى قادامى عىلىم سالاسىنان باستالىپ، رەسمي تۇردە قازىر عانا قول قويىلدى، - دەيدى قازاقستاننىڭ ۇلتتىق عىلىم اكادەمياسىنىڭ ءتوراعاسى مۇرات جۇرىنوۆ.
- تۇركى دۇنيەسىندە 240 ميلليونعا جۋىق تۇركى حالىقتارى تۇرادى. تۇركى مادەنيەتى مويىندالۋى كەرەك. وسى تۇرعىدا بىرلەسە وتىرىپ، بارلىق ەلدەردىڭ عالىمدارى عىلىمي- زەرتتەۋ جۇمىستارىمەن شۇعىلدانسا، تۇركى الەمىنە ەنەتىن ەلدەردىڭ دامۋىنا ۇلكەن سەپتىگىن تيگىزەدى».
ايتا كەتۋ كەرەك، تۇركى كەڭەسىنە مۇشە مەملەكەتتەر باسشىلارىنىڭ 2012 - جىلعى 23 - تامىزدا بىشكەكتە وتكەن II سامميتىنىڭ دەكلاراتسياسىندا عىلىم مەن بىلىم سالاسىنداعى كەڭ اۋقىمدى ىنتىماقتاستىقتى دامىتۋعا ايىرىقشا نازار اۋدارىلعان بولاتىن. وسىعان وراي، 2014 - جىلعى 28 - قاراشادا باكۋدە وتكەن تۇركى كەڭەسىنە مۇشە مەملەكەتتەر ءبىلىم مينيسترلەرىنىڭ III كەزدەسۋىندە حالىقارالىق تۇركى اكادەمياسىنا تۇركى الەمى عىلىم اكادەميالارى وداعىن قۇرۋ جونىندە وكىلەتتىلىك بەرىلگەن.
وداقتىڭ جۇمىسىن قامتاماسىز ەتەتىن حاتشىلىق حالىقارالىق تۇركى اكادەمياسىندا ورنالاسادى.
اۆتور: جاسۇلان جولدىبايەۆ
