تۋنيستە لاڭكەستىككە قارسى بەيبىت شەرۋ ءوتتى

استانا. قازاقپارات - تۋنيستىڭ سۋس قالاسىندا جۇزدەگەن ادام ءدىن اتىن جامىلعان سودىرلاردىڭ تاياۋداعى قاندى شابۋىلىنا قارسىلىق تانىتىپ، بەيبىت شەرۋگە شىقتى.

مارش تۋريستەردى اتقان قوناقۇيلەردىڭ ءبىرىنىڭ جانىندا ءوتتى، دەپ حابارلايدى BBC اگەنتتىگى.

جينالعاندار قولىنا مايشام ۇستاپ شىعىپ، «سۋس ەشقاشان ولمەيدى» دەگەن ءسوزدى ۇران ەتتى. اكسيانىڭ كەيبىر قاتىسۋشىلارى بريتانيا جالاۋىن كوتەرىپ شىقتى. سەبەبى، بۇل وقيعادا قازا تاپقان 15 ادام ۇلى بريتانيانىڭ ازاماتى ەدى.

وسىعان ۇقساس نارازىلىق شاراسى ەل استاناسى تۋنيس قالاسىندا دا ءوتتى.

ەسكە سالا كەتەيىك، 26- ماۋسىمدا سۋستاعى ەكى قوناقۇيگە جاسالعان شابۋىل سالدارىنان 38 ادام قازا تاپتى.

سوڭعى مالىمەت بويىنشا، ءوزى جالعىز جۇرتتى قانعا بوكتىرگەن شابۋىلشى جاعاجايدا دەمالۋشى سياقتى جۇرگەن.

قۇربان بولىپ، زارداپ شەككەندەردىڭ كوبى بريتانيا جانە گەرمانيا تۋريستەرى. تۋنيس بيلىگى سودىر اتىس كەزىندە ولتىرىلگەنىن حابارلادى.

شابۋىلدى «يسلام مەملەكەتى» سودىرلارى جاسادى.