ەلىمىزدە بالالاردىڭ جاراقات الۋ دەرەكتەرى جيىلەپ كەتكەن
وبلىستىق بالالار اۋرۋحاناسىنا كۇن سايىن 10-12 بالا تۇسەدى. ال دەمالىس ماۋسىمى باستالعان تۇستا مۇنداي دەرەكتەر ءتىپتى جيىلەپ كەتكەن.
بۇعان دەيىن بالالار كوبىنە جول- كولىك اپاتىنان زارداپ شەكسە، ەندى اتا- انا سالعىرتتىعى دا جازاتايىم جاعدايلارعا سەبەپ. ويناپ ءجۇرىپ، كوپقاباتتى ۇيلەردىڭ تەرەزەسىنەن قۇلاپ، جاراقات الىپ جاتقاندار از ەمەس. كىشكەنتاي ەراسىل ەكىنشى قاباتتاعى تەرەزەدەن قۇلاعان. ابىروي بولعاندا، توپىراققا ءتۇسىپ امان قالدى.
سىنعان قولىنا دارىگەرلەر گيپس سالىپ بەرگەن. قولدى- اياققا تۇرمايتىن بالالاردىڭ تەرەزەدەن قۇلاۋى جيىلەپ كەتكەن. بۇلدىرشىندەر تەرەزەدەگى تورعا سۇيەنەمىن دەپ قۇلاپ جاتادى ەكەن. مارسەل فارۋزدينوۆ، دارىگەر- تراۆماتولوگ:
- بيىل 17 وقيعا تىركەلدى. بالالاردىڭ كوبى ءوز ۇيلەرىنىڭ تەرەزەسىنەن قۇلايدى. 4 جاس پەن 6 جاس ارالىعىنداعى بالالار كوپ تۇسەدى. ءبىزدىڭ اۋرۋحاناعا تۇسكەن ءبىر بالا كوز جۇمدى. قالعاندارىن امان الىپ قالدىق. نەگىزى بالالار تەرەزەدەن قۇلاعان كەزدە ۇيدە اتا- انالارى بولادى. جىل باسىنان بەرى جول- كولىك وقيعالارىندا 138 بالا زارداپ شەككەن. 200 جاس ءوسپىرىمدى قاڭعىعان ءيت قاپقان.
تاۋلىگىنە تاسكەنە شاققان 2-3 بالا اۋرۋحاناعا تۇسەدى. وقىس جاعدايدا اياعىن سىندىرىپ العان 2 جاسار يسلام قازىر ەمدەلىپ جاتىر. اناسىنىڭ ايتۋىنشا، اۋلادا ويناپ جۇرگەن بالا ابايسىزدا قۇلاپ قالعان.
گۇلنار بەردەنوۆا، يسلامنىڭ اناسى:
- باسىندا 4 كۇن بويى جىلاپ، ۇيرەنە المادى. ءبىر ورنىندا تاپجىلماي جاتۋ بالاعا وڭاي ەمەس. ءقازىر بويى ۇيرەندى مە، جىلامايتىن بولدى. توسەكتە جاتىپ الىپ ويناي بەرەدى.
اربا مەن بەسىكتەن قۇلاپ، باس-مي جاراقاتىن العان سابيلەر دە بار. جالپى، وتكەن جىلى وبلىستىق كلينيكالىق بالالار اۋرۋحاناسىنا 8 مىڭ 500 بالا ءتۇرلى جاراقاتپەن تۇسكەن. بيىلدىڭ ءبىرىنشى توقسانىندا 11 مىڭنان اسىپ كەتكەن. جاراقات الۋ كورسەتكىشى %30 عا وسكەن. سونىمەن بىرگە بۇل كەشەندى اۋرۋحانا بۇرىن 14 جاسقا دەيىنگى بالالاردى قابىلدايتىن بولسا، بيىلدان باستاپ 18 جاسقا دەيىنگىلەردى ەمدەيتىن بولدى.
www.24.kz
