استانادا تۇركى الەمى عىلىم اكادەميالارى وداعىن قۇرۋ تۋرالى قۇجاتقا قول قويىلادى
«تۇركى كەڭەسىنە مۇشە مەملەكەت باسشىلارىنىڭ 2012-جىلعى 23- تامىزدا بىشكەكتە وتكەن ІІ سامميتىنىڭ دەكلاراتسياسىندا عىلىم مەن ءبىلىم سالاسىنداعى كەڭ اۋقىمدى ىنتىماقتاستىقتى دامىتۋعا ايرىقشا نازار اۋدارىلعان. وسىعان وراي، 2014-جىلعى 28- قاراشادا باكۋدە وتكەن تۇركى كەڭەسىنە مۇشە مەملەكەتتەر ءبىلىم مينيسترلەرىنىڭ Ⅲكەزدەسۋىندە حالىقارالىق تۇركى اكادەمياسىنا تۇركى الەمى عىلىم اكادەميالارى وداعىن قۇرۋ جونىندە وكىلەتتىلىك بەرىلگەن بولاتىن.
سوعان بايلانىستى 2015-جىلدىڭ 29- ماۋسىمىندا حالىقارالىق تۇركى اكادەمياسى استانا قالاسىندا اتالعان اكادەميالار وداعىنىڭ العاشقى قۇرىلتاي جيىنىن وتكىزەدى»، دەلىنگەن حابارلامادا.
باس قوسۋعا ازەربايجان، قازاقستان، قىرعىزستان، تۇركيا، تاتارستان، تۇركىمەنستان، باشقۇرتستان ۇلتتىق عىلىم اكادەميالارىنىڭ باسشىلارى، ماجارستان، موڭعوليا ەلشىلەرى، سونىمەن قاتار تۇركى كەڭەسى، تۇركى كەڭەسىنىڭ اقساقالدار كەڭەسى، تۇركى كەڭەسى ۋنيۆەرسيتەتتەر وداعى قاتارلى حالىقارالىق ۇيىم جەتەكشىلەرى مەن جوعارعى لاۋازىمدى تۇلعالار قاتىسادى.
حالىقارالىق تۇركى اكادەمياسى ۇيىمداستىرىپ وتىرعان قۇرىلتاي سەسسياسىندا تۇركى الەمى عىلىم اكادەميالارى وداعىن قۇرۋ تۋرالى قۇجاتقا جانە ونىڭ جۇمىسىن رەتتەيتىن نەگىزگى ەرەجەگە قول قويىلادى.
