استانادا جاڭا جاعاجاي اشىلادى

بۇل تۋرالى astana.gov.kz رەسمي سايتى حابارلادى.

قازىرگى ۋاقىتتا جوبا مەملەكەتتىك ساراپتامادان وتكىزىلۋ ۇستىندە، قورىتىندى 10 - شىلدەدە شىعادى دەپ كۇتىلۋدە.

جوسپار بويىنشا جاعاجاي بىرنەشە اۋماقتان تۇراتىن بولادى. ءبىرىنشى اۋماققا جالپى اۋدانى 2,05 گەكتارلىق اكۆاتوريا جانە ۇزىندىعى 470 مەترلىك جاعالاۋ كىرەدى. ەكىنشى اۋماققا جالپى اۋدانى 1,46 گەكتاردى قۇرايتىن قۇمداۋىت جاعاجاي ەنەدى. ول جەردە شەزلونگ، قولشاتىر، كەرەۋەت سەكىلدى بارلىق قاجەتتىلىكتەر ورناتىلادى.

جاعاجايدا مۇمكىندىگى شەكتەۋلى جانداردىڭ سۋعا ءتۇسۋى دە قاراستىرىلماق. وسى ماقساتتا ارنايى پاندۋس جاسالادى. بالالار ءۇشىن تەرەڭدىگى 0,5-0,7 مەتردەن اسپايتىن سۋعا ءتۇسۋ اۋماعى بولادى. قاۋىپسىزدىك ماقساتىندا جاعالاۋ بويىندا قۇتقارۋ مۇنارالارى سالىنادى.

سونىمەن قاتار، تاعى ءبىر قوسىمشا اۋماق جاساۋ كوزدەلگەن. وعان حالىققا قىزمەت كورسەتۋ مەكەمەلەرى، دەمالىس ورىندارى، ۇيلەر، جاسىل القاپ، مەدپۋنكت، قۇتقارۋشىلار بەكەتى ەنەدى. بەلسەندى دەمالىستى ۇناتاتىندار ءۇشىن سپورتتىق اۋماق سالىنادى. اتالمىش اۋماقتا ستريتبول، ۇستەل تەننيسى، سكەيتبوردينگ، ۆولەيبول، شاعىن فۋتبول، بادمينتون سەكىلدى بۇقارالىق سپورت تۇرلەرىمەن شۇعىلدانۋعا بولادى.

باسقارمانىڭ حابارلاۋىنشا، اتالمىش جاعاجاي كەلەسى جىلى جازدا پايدالانۋعا بەرىلمەك.