ەلىمىزدە باسىنان داۋ ارىلمايتىن قۇرىلىس سالاسىندا اۋقىمدى رەفورما باستالماق

الدىمەن جالپىعا ورتاق جاڭا قۇرىلىس ەرەجەسى پايدا بولادى دەپ حابارلايدى ك ت ك ارناسى.

1- تامىزدان باستاپ كۇشىنە ەنەتىن قۇجاتتا تۇرعىن ءۇي مەن اۋرۋحانا، مەكتەپ، بالاباقشا سىندى مەملەكەتتىك نىسانداردى تۇرعىزۋدىڭ ناقتى تالاپتارى جازىلعان.

ياعني، جاڭا جوباعا ساي، قۇرىلىسقا جەر تەلىمىن بولۋدەن باستاپ، قىزىل جولاق جۇرگىزۋ، سارالاۋ، تەحنيكالىق جانە رۇقسات قۇجاتتارىن بەرۋ ءبىر جۇيەگە بىرىكتىرىلگەن. سوندا قاعازباستىلىق قىسقارىپ، نارىقتا قۇرىلىس كومپانيالارىنىڭ قاتارى ارتادى دەگەن ءۇمىت بار.

ال باسەكەلەستىك ارتسا، ساپانىڭ دا جاقساراتىنى ايان.

بۇعان دەيىن ەلىمىزدە قۇرىلىس ەرەجەسىن جەرگىلىكتى شەنەۋنىكتەر ءوز بەتىنشە شەشىپ كەلگەن بولاتىن.

سونداي-اق، تامىز ايىنان باستاپ مەملەكەتتىك نىسان، ياعني، مەكتەپ، بالاباقشا، اۋرۋحانا سالۋعا قازىنادان قارجى جاڭا ادىسپەن بولىنبەك.

«قازىر جاڭا نىساننىڭ قۇرىلىسى باستالعاندا ءبىر باعا بەلگىلەنەدى دە، ول سوما عيمارات سالىنىپ بىتكەنشە ءجۇز وزگەرەدى. سودان ەكونوميكا مينيسترلىگىمەن ارادا داۋ تۋىندايدى. بار ماسەلە 2001 -جىلى جازىلعان ەسكى نورمادا بولىپ وتىر. ول قازىرگى جاعدايمەن سايكەس كەلمەيدى. ال، جاڭا قۇجات كۇشىنە ەنسە، مۇنداي كەدەرگىلەر جويىلادى»، - دەيدى «اتامەكەن» ۇلتتىق كاسىپكەرلەر پالاتاسى ءتوراعاسىنىڭ ورىنباسارى يۋليا ياكۋپبايەۆا.