الەم ەلدەرىندە ورازا تۇتۋ ۋاقىتىنىڭ ۇزاقتىعى قانشا؟

استانا. قازاقپارات - قاسيەتتى رامازان ايىنىڭ كەلۋىنە وراي كوپشىلىكتىڭ الەمنىڭ ءار بۇرىشىنداعى ەلدەردەگى اۋىز بەكىتۋ ۇزاقتىعى قانشا ۋاقىتقا سوزىلاتىنىن بىلگىسى كەلەتىنى انىق.

وسى ورايدا يسلام نيۋس الەم ەلدەرىندەگى ورازا ۇزاقتىعىن انىقتاۋ ماقساتىندا ارنايى زەرتتەۋ جۇرگىزدى، دەپ حابارلانعان نۇر استانا مەشىتىنىڭ سايتىندا.

كۇننىڭ ەڭ ۇزاق ۋاقىتى دانيا ەلىندە تىركەلىپ وتىر. وندا ورازانىڭ ورتاشا ۋاقىتى 21 ساعاتتى قۇرايدى. يسلانديا، نورۆەگيا جانە شۆەتسيا ەلدەرىندە ورازانىڭ ورتاشا ۇزاقتىعى - 20 ساعات، ۇلى بريتانيا مۇسىلماندارى 19 ساعات اۋىز بەكىتەدى. ال گەرمانيادا ول 18 ساعاتتان ءسال جوعارى.

ال ورازانىڭ قىسقا ۋاقىتى وڭتۇستىك امەريكا ەلدەرىنە تيەسىلى، ول 12 ساعاتتى قۇرايدى. اۆستراليا، برازيليا مەن چيليدە سايكەسىنشە 12,5، 13 جانە 12 ساعاتتان. ۆاشينگتون مۇسىلماندارى 17 ساعات اۋىز بەكىتسە، كانادا تۇرعىندارى 18 ساعاتتى ورازامەن وتكىزەدى.

ساۋد ارابياسىنداعى ورازا ۇزاقتىعى 16 ساعاتتان ءسال اسادى. بىرىككەن اراب امىرلىگىندە شامامەن 15,5 ساعات بولسا، كۋۆەيتتە - 16 ساعات. مىسىر، تۋنيس پەن الجير ەلدەرىندە ورازانىڭ ورتاشا ۋاقىتى 16,5-17,5 ساعات. قىتاي ەلى دە وسى شامالاس.

ال كورشىلەس رەسەي ەلىنىڭ مۇسىلمان جۇرتشىلىعى شامامەن 20 ساعات 49 مينۋت ورازا تۇتادى.