الماتى اكىمى ءداستۇرلى ءدىندى ناسيحاتتاۋ جۇمىستارىن كۇشەيتۋدى تاپسىردى

 الماتى. قازاقپارات - بۇگىن الماتىدا قالا اكىمى احمەتجان ەسىموۆتىڭ توراعالىعىمەن انتي تەررورلىق كوميسسيانىڭ ءماجىلىسى ءوتتى.

جيىن بارىسىندا قۇقىق قورعاۋ ورگاندارىنىڭ وكىلدەرى، ءتۇرلى ۆەدومستۆولار مەن قالا باسقارمالارىنىڭ باسشىلارى ادام كوپ شوعىرلاناتىن ورىنداردا ءدىني ەكسترەميزم مەن تەرروريزمنىڭ الدىن الۋدىڭ ماڭىزدى ماسەلەلەرىن تالقىلادى.

قالا باسشىسى تەرروريزمگە قارسى كۇرەسكە قاتىساتىن مەملەكەتتىك ورگانداردىڭ قارجىلاي جانە ماتەريالدىق- تەحنيكالىق قامتاماسىز ەتىلۋى ءتيىستى دەڭگەيدە ەكەندىگىن اتاپ ءوتتى. وسى ماقساتتار ءۇشىن قالا بيۋدجەتىنەن 2014-2015 - جىلدارى 104 ميلليون تەڭگەدەن استام قارجى بولىنگەن.

«بۇقارانىڭ ءدىني ساۋاتتىلىعىن ارتتىرۋ، دەسترۋكتيۆتى ءدىني اعىمداردىڭ شىنايى ءىس- ارەكەتىن اشۋ شارالارى جۇزەگە اسۋدا. ءداستۇرلى ءدىندى ناسيحاتتاۋ، ازاماتتاردىڭ بويىندا ءبىزدىڭ حالقىمىزدىڭ مادەني مۇراسىنا سايكەس كەلەتىن ءدىني سەنىمدى قالىپتاستىرۋ بويىنشا جۇرگىزىلەتىن جۇمىستار كۇشەيتىلۋدە. الايدا، ازاماتتاردى، اسىرەسە جاستاردى راديكالدى ءدىني يدەولوگيادان الاستاتۋدا ولقىلىقتار مەن كەمشىلىكتەر دە جوق ەمەس»، - دەدى احمەتجان ەسىموۆ.

وسى رەتتە الماتى اكىمى قالا قۇرىلىمدارىنىڭ باسشىلارىنا ءوز بەتىنشە جۇرگەن جانە جۇمىسسىز جاستار اراسىندا اقپاراتتىق- ناسيحاتتىق توپتاردىڭ (ا ن ت) جۇمىستارىن بۇرىنعىدان دا كۇشەيتۋدى، ولاردى قوسىمشا ءبىلىم الۋعا، دەنەشىنىقتىرۋمەن، سپورتپەن اينالىسۋعا كەڭىنەن تارتۋدى، وپەراتيۆتى باقىلاۋ ورتالىعىنىڭ تەحنيكالىق مۇمكىندىگىن كەڭەيتۋدى، قالانىڭ ەلەكتروندى كارتاسىن مودەرنيزاتسيالاۋدى تاپسىردى.

ايتا كەتەيىك، الماتىدا 9 اقپاراتتى- ناسيحاتتىق توپ جۇمىس ىستەيدى، ولار تۇرعىنداردىڭ ءدىني ساۋاتتىلىعىن ارتتىرۋ، دەسترۋكتيۆتى ءدىني اعىمداردىڭ شىنايى ءىس- ارەكەتىن اشۋ بويىنشا ناقتى جۇمىستار اتقارىپ كەلەدى.

اۆتور: گۇلميرا عوسمانالي