استانادا اقىن وڭايگۇل تۇرجاننىڭ «تەڭىزدەر دە شولدەيدى» اتتى جىر كەشى وتەدى
و. تۇرجان ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنىڭ دوسەنتى، فاريزا وڭعارسىنوۆا نەگىزىن قالاعان «تۇمار» جۋرنالىنىڭ باس رەداكتورى، فيلولوگيا عىلىمدارىنىڭ كانديداتى، عالىم- زەرتتەۋشى، اۋدارماشى. ول «سامال» (1987)، «شەرقالا» (1998)، «جىر- دالا» (2001)، «تەڭىزدەر دە شولدەيدى» (2003)، «جىر كىتابى» (2007) اتتى بىرنەشە جىر جيناقتارىنىڭ اۆتورى. قازاقستان جازۋشىلار وداعىنىڭ مۇشەسى، تولەگەن ايبەرگەنوۆ اتىنداعى ادەبي سىيلىقتىڭ لاۋرەاتى.
2012 - جىلى تاۋەلسىزدىگىمىزدىڭ 20 جىلدىعىنا ارنالىپ وتكىزىلگەن رەسپۋبليكالىق ءمۇشايرانىڭ باس جۇلدەگەرى.
لوندون قالاسىندا وسى جىلدىڭ 23 - ساۋىرىندە اعىلشىن تىلىنە اۋدارىلعان و. تۇرجاننىڭ ءبىر توپ ولەڭدەرىنىڭ تۇساۋكەسەرى ءوتتى.
ءوزىنىڭ مازمۇندى جىرلارىمەن رەسپۋبليكامىزعا تانىمال و. تۇرجاننىڭ عىلىم سالاسىندا دا وزىندىك قولتاڭباسى بار. ونىڭ «ماحامبەت ولەڭدەرىنىڭ پوەتيكاسى» اتتى مونوگرافياسى ەكىنشى قايتارا باسىلىپ شىقتى. سونداي- اق ىستامبۋل ۋنيۆەرسيتەتىنىڭ پروفەسسورلارى ايلا جانە ايدەمير وكايمەن بىرىگىپ جوعارى وقۋ ورىندارىنا ارنالعان «جۇرتشىلىقپەن بايلانىس: نەگىزگى ۇعىمدار، ستراتەگياسى مەن تاجىريبەلەرى» اتتى وقۋلىق جازىپ، جارىققا شىعاردى.
ول اۋدارما سالاسىنا دا قوماقتى ۇلەس قوستى. شەتەلدىك كلاسسيك- قالامگەرلەر س. سۆەيگ، ز. فرەيد، ۆ. شوينكا، گ. ۆاسيليەۆ شىعارمالارىن قازاق تىلىنە اۋداردى.
اقىن شىعارماشىلىعىنا ارنالعان «تەڭىزدەر دە شولدەيدى» اتتى جىر كەشى ازاتتىق تاقىرىبىنا ارنالعان. كەش درامالىق- سازدى سيپاتتا وتەدى.
كەش قوناقتارى: ءابىش كەكىلبايەۆ، ايمان مۇساحودجايەۆا، قۋانىش سۇلتانوۆ، اكىم تارازي، نۇرلان ورازالين، اقۇشتاپ باقتىگەرەيەۆا باستاعان اقىن- جازۋشىلار، ق ر پارلامەنتى سەناتى مەن ءماجىلىسىنىڭ دەپۋتاتتارى، استانا قالاسى اكىمدىگىنىڭ وكىلدەرى، ب ا ق وكىلدەرى جانە باسقا دا جىر سۇيەر قاۋىم شاقىرىلىپ وتىر.
جادىرا شامۇراتوۆا
