استاناداعى «ازىرەت سۇلتان» مەشىتىندەگى العاشقى تاراۋيح نامازى وقىلدى - فوتو
قاسيەتتى ايمەن ساعىنا قاۋىشقان ەلوردا جۇرتشىلىعى بۇگىن قۇلشىلىق وردالارىنا اعىلدى دەسەك تە بولعانداي. مەشىتكە جيىلعان 6000 نان استام جاماعاتقا ق م د ب- نىڭ ءنايب ءمۇفتيى، «ازىرەت سۇلتان» مەشىتىنىڭ باس يمامى سەرىكباي وراز ساتىبالدى ۇلى قاسيەتتى ايدىڭ قادىرى تۋرالى ۋاعىز ايتىپ، بيىلعى جىلى قۇران كارىمدى حاتىم ەتەتىن قاريلاردى تانىستىرىپ ءوتتى.
ەلوردامىزدىڭ ەڭسەلى مەشىتىندە بيىلعى رامازان ايىندا قاسيەتتى قۇران كارىمدى ەلىمىزدىڭ ءتورت ۇزدىك قاريلارى حاتىم ەتەتىن بولادى.
ولاردىڭ ءبىرى بيىلعى رەسپۋبليكالىق قۇران سايىسىندا توپ جارىپ، تەمىر تۇلپاردى قانجىعالاعان دۋلات بولاتبەك ۇلى بولسا، «ازىرەت سۇلتان» مەشىتىنىڭ نايب يمامى عازيز احمەتوۆ پەن ءال- ازھار ۋنيۆەرسيتەتىندە ءبىلىم الىپ جاتقان ياحيا سانسىزباي ۇلىمەن مەشىت جاماعاتى باياعىدان تانىس. ال، ءتورتىنشى قاري رەتىندە الماتى قالاسىنداعى «اسكەر اتا» مەشىتىنىڭ ۇستازى ءارى ازانشىسى يسمانوۆ اليمحان شاقىرىلىپ وتىر.
ءبىر ايتا كەتەرلىگى، تاراۋيح نامازىنا كەلۋشىلەردىڭ سانى جىلدان- جىلدان ارتىپ كەلە جاتقانى بايقالادى. بيىلعى جىلعى العاشقى تاراۋيح نامازىنا 6000 نان استام جاماعات جيىلدى. نامازدان سوڭ كەلۋشىلەردى استانا قالاسى اكىمشىلىگىنىڭ دەمەۋشىلىگىمەن ىسكە قوسىلعان تەگىن اۆتوبۋستار تاسىمالداۋدى باستاپ كەتتى.
ەستەرىڭىزگە سالا كەتەيىك، «ازىرەت سۇلتان» مەشىتىندە ءۇش باعىت بويىنشا ءتورت اۆتوبۋس تاراۋيح نامازىنان سوڭ تەگىن تاسىمالدايتىن بولادى.
