08:38, 18 - ماۋسىم 2015 | GMT +5
قىتايدا قازاقستاننىڭ لوگيستيكالىق مۇمكىندىكتەرى تانىستىرىلدى
بەيجىڭ- كۋنشان. قازاقپارات - ق ح ر جياڭسۋ پروۆينسياسىنداعى كۋنشان قالاسىندا 16-18 ماۋسىم ارالىعىندا ءوتىپ جاتقان جىل سايىنعى «لوگيستيكا تەحنولوگيالارى - 2015» جارمەڭكە- كورمەسىندە قازاقستان لوگيستيكالىق مۇمكىندىكتەرىن تانىستىردى.
«قىتاي - قازاقستاننىڭ ەڭ ءىرى سىرتقى ساۋدا ارىپتەسى، ويتكەنى ق ر تاۋار اينالىمىنىڭ جالپى كولەمىندە ۇلەسى 20 پايىزدان اسادى. ءوز كەزەگىندە، قازاقستان - ق ح ر-دىڭ ورتالىق ازياداعى ءبىرىنشى، شىعىس ەۋروپا مەن تمد ەلدەرى اراسىندا رەسەيدەن كەيىن ەكىنشى ءىرى ساۋدا ارىپتەسى»، دەدى قازاقستاندىق ستەندتى كورسەتۋ بارىسىندا شاڭحاي قالاسىنداعى ق ر باس كونسۋلى جوشىحان قىراۋبايەۆ.
كورمەدە ول ەكى ەلدىڭ ساۋدا، ەنەرگەتيكا، ينفراقۇرىلىم قۇرىلىسى، كولىك، اۋىل شارۋاشىلىعى سياقتى سالالاردا ءوزارا ىنتىماقتاستىعىن اتاپ ءوتتى. بۇل رەتتە ديپلومات ەكىجاقتى قاتىناستاردىڭ ستراتەگيالىق سيپاتتاعى ايقىن دالەلدەرىنىڭ ءبىرى جوعارى دەڭگەيدەگى بايلانىس ديناميكاسى ەكەندىگىنە ايرىقشا توقتالدى.
