مەملەكەتتىك حاتشى ات شانامەن جۇكتى ايەلدى اۋدان ورتالىعىنا جەتكىزىپ، قۇتقارعان ايەل دارىگەردى قابىلدادى

استانا. قازاقپارات - بۇگىن اقوردادا مەديتسينا قىزمەتكەرلەرى كۇنى قارساڭىندا ق ر مەملەكەتتىك حاتشىسى گۇلشارا ءابدىقالىقوۆا سالا ماماندارىن قابىلداۋ بارىسىندا قىستا اۋىلدان ات شانامەن جۇكتى ايەلدى اۋدان ورتالىعىنا جەتكىزىپ، قۇتقارعان فەلدشەرمەن كەزدەستى.

«وتىز جىل بويى ءبىر ورىندا جۇمىس ىستەپ كەلەمىن. وسى قىزمەتىمدە ءتۇرلى قيىندىقتار كەزدەستى. سونىڭ ءبىرى 2014 -جىلى ورىن العان بولاتىن. سول جىلى ءبىر تۇندە قار جاۋىپ، بوران بولىپ، اۆتوكولىكپەن جولعا شىعۋ مۇمكىن بولماي قالدى. اۋداندىق اۋرۋحاناعا حابارلاسىپ، ول جاقتان توتەنشە جاعدايلار قىزمەتكەرلەرىن شاقىردىق. ءبىراق، ولاردى كۇتپەي، جۇكتى ايەلدى ات شانامەن 12 شاقىرىم جەرگە دەيىن جەتكىزۋگە تۋرا كەلدى. ابىروي بولعاندا كەلىنشەكتى سول جەرگە جەتكىزىپ، ونى توتەنشە جاعدايلار قىزمەتكەرلەرىنە تاپسىرىپ، ونى اۋداندىق اۋرۋحاعا دەر كەزىندە اپارىپ، امان-ەسەن بوساندىرىپ الدىق»، - دەدى شىعىس قازاقستان وبلىسىنداعى قارابۇيرات اۋىلى مەديتسينالىق پۋنكتىنىڭ فەلدشەرى كۇلسىم دۇيسەنبايەۆا تىلشىلەرگە بەرگەن سۇحباتىندا.

ونىڭ سوزىنە قاراعاندا، «100 مەكتەپ، 100 اۋرۋحانا» باعدارلاماسى بويىنشا ءۇرجار اۋدانى بويىنشا ەلدى مەكەندەردە 4 امبۋلاتوريا پايدالانۋعا بەرىلدى.

«ءوزىمىنىڭ وتىز جىلدىق تاجىريبەمدە اۋىلدا انا مەن بالا ءولىمى بولعان جوق. سوڭعى بەس جىلدا تۋبەركۋلەز، قاتەرلى ىسىك اۋرۋلارى تىركەلمەدى. بۇنداي دەرتتەردىڭ الدىن الۋعا بۇگىندە جۇرگىزىلىپ جاتقان سكرينينگتەر جاقسى ناتيجە بەرۋدە ، - دەدى ك. دۇيسەنبايەۆا.

اۆتور: رۋسلان عابباسوۆ