قالا كۇنى قارساڭىندا ستيۆەن سيگال استاناداعى جەكپە- جەكتەر ونەرى فەستيۆالىنە قاتىسادى

استانا. قازاقپارات - استانادا ەلوردا كۇنىن مەرەكەلەۋ اياسىندا جەكپە- جەكتەر ونەرىنىڭ ءبىرىنشى حالىقارالىق فەستيۆالى وتەدى، وعان گولليۆۋد اكتەرى، ايكيدو ايكيكايدىڭ جەتىنشى دان يەگەرى ستيۆەن سيگال قاتىسادى.

بۇل تۋرالى بۇگىن و ك ق- دە وتكەن باسپا ءسوز كونفەرەنتسياسىنىڭ بارىسىندا «استانا قالاسىنىڭ مادەنيەت باسقارماسى» م م باسشىسى بولات ماجاعۇلوۆ حابارلادى.

 «استانادا قالا كۇنىن مەرەكەلەۋ اياسىندا گولليۆۋد جۇلدىزى، ستيۆەن سيگال، اكتەر، كاسىبي سپورتشى، «بوكس الەمى»، «قاھارماندار ەلى» تەلەجوباسىنىڭ جۇرگىزۋشىسى سەرگەي باديۋك، سونداي- اق كاسىبيلەر اراسىندا كيك بوكسينگتەن قازىرگى چەمپيون باتۋ حاسيكوۆتىڭ قاتىسۋىمەن وتەتىن جەكپە- جەكتەر ونەرىنىڭ ءبىرىنشى حالىقارالىق فەستيۆالى جوسپارلانعان»، - دەپ ناقتىلادى ب. ماجاعۇلوۆ.

ۇيىمداستىرۋشىلاردىڭ اقپاراتىنشا، فەستيۆالعا ا ق ش، قازاقستان، قىتاي، رەسەي، چەحيا، وڭتۇستىك كورەيا جانە جاپونيا ەلدەرىنەن وزدەرى قاتىساتىن جەكپە- جەك تۇرلەرىندەگى ۇزدىك شەبەرلەر مەن ەڭ جوعارى بەلبەۋلەر مەن دانداردىڭ يەلەرى قاتىسادى. ايكيدو، دجيۋ- دجيتسۋ، كاپوەيرا، بۋدزينكان، تاي بوكسى، كاراتە گودزيۋ- ريۋ، شين كالي، كەندو، تايەكۆوندو، ۆين- چۋن، شاولين جانە قول جەكپە- جەگى سياقتى 12 ءتارتىپ ءتۇرى بويىنشا كورنەكى جەكپە- جەكتەردى وتكىزۋ جوسپارلانعان.

جەكپە- جەكتەر ونەرىنىڭ فەستيۆالى 26 - ماۋسىم كۇنى استاناداعى «داۋلەت» ۇلتتىق تەننيس ورتالىعىندا وتەدى.

 بۇدان باسقا، استانا كۇنىن مەرەكەلەۋ اياسىندا 3 - ماۋسىم كۇنى ەلوردادا «M-1 Challenge 59 - نومادتار شايقاسى - 5» ارالاس جەكپە- جەكتەن كەزەكتى جارىس بولىپ وتەدى. بۇل كەشتىڭ باستى ايقاسى -  ММА اۋىر سالماقتاعى سپورتشىلارى كەنني گارنەر مەن سەرگەي حاريتونوۆتىڭ جەكپە- جەگى بولماق. ۇيىمداستىرۋشىلاردىڭ سەندىرۋىنشە، بۇل ايقاس جانكۇيەرلەردىڭ اراسىندا ۇلكەن قىزىعۋشىلىق تۋدىرىپ وتىر.