الماتى وبلىسىندا قىرعىزستاندىق ازاماتتاردى قۇلدىقتا ۇستاعاندار جاۋاپقا تارتىلادى
قازاقستاننىڭ قۇقىق قورعاۋ ورگاندارىنىڭ كومەگىمەن اتالعان ازاماتتاردىڭ قىرعىزستاننىڭ شۋ وبلىسى مەن بىشكەك قالاسىنان شۋ وزەنى ارقىلى زاڭسىز وتكىزىلىپ، ەگىس القاپتارىندا تەگىن ەڭبەك ەتۋگە ماجبۇرلەنگەندەرى انىقتالدى، دەپ حابارلانعان قىرعىز رەسپۋبليكاسىنىڭ سىرتقى ىستەر مينيسترلىگىنىڭ سايتىندا.
ەگىستىك يەلەرى ولاردىڭ قۇجاتتارىن قىرعىزستاندا جۇرگەندەرىندە-اق الىپ قويىپ، قاشىپ قۇتىلا المايتىندارىن ايتىپ، قوقان-لوققى كورسەتكەن. كەيىنىرەك انىقتالعانداي، بۇل جەردە جالپى سانى 17 قىرعىزستاندىق ازامات تەگىن ەڭبەك ەتىپ جۇرگەن. القاپ يەسى ولاردى ارىقتار مەن قامىس اراسىنا جاسىرىپ ۇلگەرگەن.
«قازىرگى كەزدە قىرعىزستاننىڭ باس كونسۋلدىعىنىڭ سۇراۋى بويىنشا اتالعان ىسكە قاتىستى قازاقستاننىڭ قۇقىق قورعاۋ ورگاندارى قىلمىستىق ءىس قوزعادى. زاڭسىز ماجۇربلەپ ەڭبەككە تارتۋ، ازاماتتاردىڭ قۇجاتتارىن الىپ قويۋ، سونىمەن قاتار شەكارادان ولاردى زاڭسىز وتكىزۋگە ايىپتى دەپ تانىلىپ وتىرعان تۇلعالاردى انىقتاۋ بويىنشا تەرگەۋ امالدارى جۇرگىزىلۋدە»، دەلىنگەن حابارلامادا.
تابىلعان قىرعىز ازاماتتارى ولارعا ءوز وتاندارىنا ورالعانعا دەيىن قاجەتتى پسيحولوگيالىق جانە قۇقىقتىق كومەك كورسەتۋ ءۇشىن ۋاقىتشا الماتىداعى وڭالتۋ ورتالىقتارىنىڭ بىرىنە ورنالاستىرىلدى.
