ورتالىق ازيانىڭ ۇزدىك اۋە كومپانياسى «ەير استانا» اتاندى

استانا. قازاقپارات - «ەير استانا» اۋە كومپانياسى فرانسيادان جۇلدەلى ورالدى.

«ەير استانا» كەزەكتى جەتىستىككە قول جەتكىزدى. لە-بۋرجەدەگى 51- پاريج اۋە-عارىشتىق شوۋىنىڭ اياسىندا وتكەن Skytrax World Airline Awards 2015 ماراپاتتاۋ سالتاناتى بارىسىندا «ەير استانا» ءتورتىنشى جىل قاتارىنان «ورتالىق ازيا جانە ءۇندىستاننىڭ ۇزدىك اۋە كومپانياسى» اتانىپ، 4 جۇلدىزدى رەيتينگكە يە بولدى.

سونىمەن قاتار ۇلتتىق اۋە تاسىمالداۋشى «ورتالىق ازيا جانە ءۇندىستاننىڭ ۇزدىك قىزمەت كورسەتۋشى اۋە كومپانياسى» سىيلىعىمەن ءۇشىنشى رەت ماراپاتتالدى»، دەپ حابارلانعان كومپانيانىڭ فەيسبۋك الەۋمەتتىك جەلىسىندەگى پاراقشاسىندا.

Skytrax World Airline Awards اۋە كومپانيالارىنىڭ قىزمەتتەرىنە جولاۋشىلاردىڭ قاناعاتتانۋ دەڭگەيىن انىقتايتىن الەمدەگى نەگىزگى باعالاۋ ءتاسىلى بولىپ تابىلادى. Skytrax ساۋالناما جۇرگىزىپ، قىزمەت كوسەتۋدىڭ جانە قىزمەتتەردىڭ نەگىزگى تۇرلەرى، سونىڭ ىشىندە، جولاۋشىلاردى تىركەۋ، بورتقا وتىرعىزۋ، اۋە كەمەسى سالونىنىڭ جايلىلىعى مەن تازالىعى، بورتتاعى تاعام مەن سۋسىندار ساپاسى، ويىن-ساۋىق جۇيەسى، بورتسەرىكتەردىڭ قىزمەت كورسەتۋى سىندى كورسەتكىشتەر بويىنشا اۋە كومپانيالار قىزمەتىنىڭ ساپاسىن باعالايدى.