ەلوردادا ماسالاردى ۋلاۋ جۇمىستارى قايتا باستالدى
بيىل قانسورعىش جاندىكتەردى دەزينسەكسيالاۋ جۇمىستارىن «ەلوردالىق دەزينفەكسيا» ج ش س ورىنداپ جاتىر.
دەزينسەكسيالاۋ جۇمىستارىن باستاۋ اۋا تەمپەراتۋراسىنا بايلانىستى بولادى. كوپ جىلدىق مونيتورينگتىڭ مالىمەتتەرى بويىنشا ەلوردادا اتالمىش جۇمىستار ءساۋىردىڭ ەكىنشى ون كۇندىگىنەن باستالادى. ماسالاردىڭ ۇياسى كىشىگىرىم كولشىكتەردە، ۋاقىتشا سۋ جايىلعان جەرلەردە ورنالاسادى.
مۇنداي جۇمىستار ساۋىردەن قىركۇيەككە دەيىن ايىنا ءبىر رەت جۇرگىزىلەدى. پرەپاراتتاردىڭ اسەرىن ازايتاتىن جاڭبىر، كۇشتى جەل جانە ت. ب. فاكتورلاردى ەسەپتەمەگەندە، ينسەكتيتسيد اسەرىنىڭ ۇزاقتىعى ورتاشا ەسەپپەن 20 كۇنگە جالعاسادى.
استانا اۋماعىندا جاندىكتەردى دەزينسەكسيالاۋ (شاعىن كولشىكتەردە) 29 - ساۋىردە، ال، ماسا مەن شىركەيدىڭ جازعى تۇرلەرىنە قارسى جۇمىستار 2 - مامىردا باستالعان بولاتىن.
كوممۋنالدىق شارۋاشىلىق باسقارماسىنىڭ حابارلاۋىنشا، جۇمىستاردىڭ ناتيجەسىنە جاڭبىر مەن كۇشتى جەلدەر (21 م/س) سەپتىگىن تيگىزگەن. جاۋىن- شاشىننىڭ سالدارىنان تۇرعىن الاپتارىندا قامىس پەن شوپتەر تەز وسە باستادى، بۇل دا جۇمىستىڭ ونىمدىلىگى مەن ناتيجەلىلىگىنە كەرى اسەر ەتەدى. شىبىن- شىركەيلەرگە قارسى وڭدەۋ جۇمىستارىنىڭ ءبىرىنشى كەزەڭىن 22 - مامىرعا دەيىن اياقتاۋ جوسپارلانعان بولاتىن، الايدا، اۋا رايىنىڭ قولايسىزدىعىنا بايلانىستى تەك 15 - ماۋسىمعا دەيىن جالعاستى.
ماسالارعا قارسى كۇرەس جۇمىستارىنىڭ ەكىنشى كەزەڭى ۇستىمىزدەگى جىلدىڭ 23-28 مامىرى ارالىعىندا جۇرگىزىلدى. جازعى ماسا تۇرلەرىن دەزينسەكتسيالاۋ 2 - ماۋسىمدا باستالدى. اتالعان كەزەڭدە نوسەرلەر جاۋدى - 5.06 - 9.06.15 ج. جانە 11.06 - تاڭەرتەڭ؛ 12.06؛ 14.06 (جەلدىڭ كۇشەيۋى، نوسەر). بۇل فاكتورلار (جاڭبىر، جەل، جوعارى ءوسىمتالدىق جانە ت. ب. ) جۇمىسقا كەدەرگى كەلتىرگەندىكتەن جۇمىس جوسپارى ۋاقىتىلى ورىندالمادى. ماسالاردىڭ كوپتەپ جينالۋىنا سۋ دا اسەر ەتەدى، بۇل تەك وزەندەر مەن سۋ قويمالارى عانا ەمەس، سونداي- اق، كوپ قاباتتى جانە جەكە ۇيلەردىڭ جەرتولەلەرى، ۋاقىتشا قۇرىلىس ارنالارى، سۋ تولعان شۇڭقىرلار، قالا ماڭىنداعى قامىستى جەرلەر. وسىعان بايلانىستى، وڭدەۋ جۇمىستارى ماسالاردى تولىقتاي جويۋ ەمەس، سانىن ازايتۋ ماقساتىندا جۇرگىزىلەدى.
قالا تۇرعىندارىنىڭ ايتۋىنشا، ماسا شاققاننان كەيىن تەرى ءىسىپ كەتەدى. قالالىق كوممۋنالدىق شارۋاشىلىق باسقارماسىنىڭ حابارلاۋىنشا، شاققاننان كەيىن ۇرعاشى ماسا تەرىگە انتيكواگۋليانت ەنگىزەدى، بۇل زات قاننىڭ ۇيۋىنا كەدەرگى كەلتىرىپ، ونى سورۋعا مۇمكىندىك بەرەدى. سونىڭ سالدارىنان ماسا شاققان جەر قىشىپ، ءىسىپ كەتەدى. بۇل قالىپتى جاعداي. سونىمەن قاتار، اۋىر اللەرگيالىق رەاكسيا دا ورىن الۋى مۇمكىن.
ماسا شاققان جەردىڭ قىزارۋى مەن ءىسىپ كەتۋى 3-4 ساعاتقا، كەيدە بىرنەشە تاۋلىككە سوزىلۋى مۇمكىن. سونداي- اق، قىشىعان جەردى قاسۋ كەزىندە ينفەكسيالى جارالار باستالۋى مۇمكىن. بۇدان اسىرەسە، بالالار كوپ زارداپ شەگەدى. وسىعان بايلانىستى، ماسا شاققان جەرلەرگە قىشىنۋعا قارسى «پسيلو» بالزامىن، «زۆەزدوچكا»، تروينوي ودەكولونىن، ءمۇساتىر ءسپيرتىن، ازداعان سودا ەرىتىندىسىن جانە تۇز ەرىتىندىسىن نەمەسە اشىعان ءسۇت ونىمدەرى (ايران، سارىسۋ) جانە ت. ب. جاققان دۇرىس.
Baq.kz
