ۇلتتىق مۇددە، سالت- داستۇرگە كەلگەندە وزگە ءتىلدى باسىلىمدار ءۇنسىز قالادى - نۇرتورە ءجۇسىپ
بۇل تۋرالى بۇگىن شىمكەنتتەگى «Rixos» قوناق ءۇيىنىڭ ءماجىلىس زالىندا وتكەن «بەس ينستيتۋتسيونالدىق رەفورما. 100 ناقتى قادام: اقپاراتتىق قامتۋ جانە ىلگەرىلەتۋ» ايماقتىق جۇرناليستەر فورۋمىندا «ايقىن» رەسپۋبليكالىق قوعامدىق- ساياسي گازەتىنىڭ باس رەداكتورى نۇرتورە ءجۇسىپ ايتتى،
دەپ حابارلايدى Bnews.kz ءتىلشىسى.
«مەنىڭ ءبىر بايقاعانىم، 25 جىلدىڭ ىشىندە قازاقستانداعى قازاقءتىلدى گازەتتەردىڭ بارلىعى ەلىمىزدىڭ تاۋەلسىزدىگىنە تىلەۋلەس، جاناشىر، مۇراتتاس، نيەتتەس قالپىنان جاڭىلماي كەلە جاتىر. بۇل - وتە ۇلكەن قۇندىلىق. گازەت- جۋرنالداردىڭ مەنشىك يەسىنە قاراماستان ءبىر ماقساتقا، ەلدىك، مەملەكەتتىك باعىتقا جۇمىلۋى دەگەن كەرەك نارسە. ەلىمىز جاڭادان قالىپتاسىپ، ىرگەسىن ەندى بەكىتىپ، مەملەكەت بولۋعا ۇمتىلىپ جاتقان كەزەڭدە قازاقءتىلدى ب ا ق- تىڭ ءبىراۋىزدى بولۋى اتاپ وتەرلىك، باعالايتىن دۇنيە»، - دەيدى نۇرتورە ءجۇسىپ.
نۇرتورە ءجۇسىپ اتاپ وتكەندەي، قازاقستاندا ورىس ءتىلدى باسىلىمدار دا بار. وزگە ءتىلدى باسىلىمداردىڭ كوبى ەلدىك، مەملەكەتتىك، ۇلتتىق، سالت- داستۇرگە بايلانىستى، نە بولماسا اتاۋلى داتالارعا قاتىستى ماسەلەلەردى جازۋعا كەلگەندە ءبىرجاقتى قالادى. بولماسا، سىرتتاي باقىلاۋشىنىڭ ءرولىن اتقارادى.
«مىسالى، الدا ابايدىڭ 170 جىلىق مەرەيتويى كەلە جاتىر. وسىعان بايلانىستى ورىسءتىلدى باسىلىمداردان تۇشىمدى ماقالا وقىعان جوقپىن. قازاق حاندىعىنىڭ 550 جىلدىعىنا بايلانىستى دا وسى جاعداي. بۇل تويدى دۇبىرلەتىپ، قوعامدىق ساناعا سىڭىرۋگە جۇمىس جاساعانىمىزعا دا ءبىراز ۋاقىت بولدى. ءبىراق، ورىس ءتىلدى باسىلىمداردان «قازاق حاندىعىنىڭ 550 جىلدىعىنا» قاتىستى جۇيەلى، ارنالى، ماعىنالى دۇنيەلەردى كەزدەستىرە المايمىز. ءبىر مەملەكەتتە تۇرىپ ەكى ءتۇرلى يدەولوگيا، ەكى باعىت، ەكى ءتۇرلى ناسيحاتتىڭ ارناسىنا ءتۇسىپ كەتكەندەيمىز. وسىدان شىعۋدىڭ جولىن ەلباسى نۇرسۇلتان نازاربايەۆ 100 ناقتى قادامىندا كورسەتىپ وتىر. بۇل رەفورمانىڭ تۇبىرىنە ءۇڭىلىپ قاراساڭىز، بىرتەكتىلىك دەگەن ۇعىم جاتىر»، - دەيدى رەداكتور.
