11:41, 16 - ماۋسىم 2015 | GMT +5
شۇعىل: استانادا مەملەكەتارالىق ىزدەۋدە بولعان ا. ابىلتايەۆ ۇستالدى
استانا. قازاقپارات - ۇيىمداسقان قىلمىسقا قارسى كۇرەس جۇرگىزۋ قىزمەتكەرلەرى مەن ەلوردالىق ءى ءى د-نىڭ «ارلان» ارنايى بولىمشەسى قىزمەتكەرلەرىنىڭ قاتىسۋىمەن بولعان جەدەل-ىزدەۋ شارالار كەشەنىن وتكىزۋ بارىسىندا اسا اۋىر قىلمىس جاساعانى ءۇشىن كۇدىكتى تانىلىپ، مەملەكەت ارالىق ىزدەۋدە بولعان 1980 -جىلعى ابىلتايەۆ ارمان ۇستالدى.
استانا قالاسى پوليتسياسىنىڭ اقپاراتىنشا، قىلمىستىق قۋدالاۋدان ءىزىن جاسىرعان ابىلتايەۆ سىرتقى كەلبەتىن ايتارلىقتاي وزگەرتكەن.
ۇستالعان ازامات استانا قالالىق ءى ءى د- نىڭ ۋاقىتشا ۇستاۋ اباقتىسىنا قامالدى.
سوت الدىنداعى تەرگەۋ امالدارى جۇرگىزىلىپ جاتىر.
ەسكە سالا كەتەيىك، 21 -ساۋىردە استانا تۇرعىنى نۇرلان جۇماعۇلوۆ الەۋمەتتىك جەلىگە ءوزىنىڭ ۇلى ءالىبيدىڭ اياۋسىز ۇرىپ سوعىلعانى، بۇل ىسكە كاسىپكەر قايرات جاماليەۆتىڭ قاتىسى بولۋى مۇمكىن ەكەنى تۋرالى اقپارات جاريالادى. 24 جاستاعى جىگىتتى سوققىعا جىقتى دەگەن كۇدىكپەن كاسىپكەر قايرات جاماليەۆ پەن ونىڭ جۇرگىزۋشىسى اناتولي پريبىتكوۆ تا ۇستالدى. ال، ءۇشىنشى كۇدىكتى ارمان ابىلتايەۆكە ىزدەۋ جاريالانعان بولاتىن.
