ءسابيدى ورتتەن امان الىپ شىققان قىزىلوردالىق ستۋدەنت ماراپاتتالدى

استانا. قازاقپارات - قىزىلورداداعى گۋممانيتارلىق كوللەدج ستۋدەنتى دانيار قاۋىشقان ورتكە ورانعان ۇيدە قالعان ءسابيدى قۇتقاردى.

1 جارىم جاسار ءسابي جاس جىگىتتىڭ وجەتتىلىگى ارقاسىندا اجالدان امان قالدى. دانياردىڭ بەيبىت كۇنگى ەرلىگى ەشكىمدى بەي-جاي قالدىرمادى. باتىر جىگىتتىڭ باتىل قادامى توتەنشە جاعدايلار مينيسترىلىگى تاراپىنان دا لايىقتى باعالاندى.

جەتى بولمەلى ەڭسەلى ءۇيدىڭ ورنى وسى. ءتىلسىز جاۋ تىپ-تيپىل ەتىپ، كۇلىن قالدىرىپتى. سول ءبىر سۇمدىقتى ءۇي يەسى زويا وماروۆا كۇرسىنە ەسكە الادى. وقيعا ناۋرىز ايىنىڭ ورتا شەنىندە بولعان. ۇيدە جاس كەلىن مەن بەس نەمەرەسى قالعان ەكەن. كەنەت تۇپكى بولمەدەن قارا ءتۇتىن بۋداقتاي باستاعاندا، ۇيدەگىلەردىڭ ءبارى دالاعا قاشىپ شىعادى.

تەك بەسىكتە بولەۋلى قالعان مەيىرجاندى قۇتقارۋ قيىنعا سوعادى.

زويا وماروۆا، قالا تۇرعىنى:

- بالانىڭ اياعى كۇيىپ جاتقاننان كەيىن جىلاعان. ءوزىمنىڭ 1991 -جىلعى مارات ەسىمدى بالام بار. الايدا سەمىز بولعاسىن ىشىنە كىرە المادى. سونىمەن جاڭاعى كورشى بالانى شاقىردىق.

دانيار ءۇي ىشىنە كىرىپ، بالانى الىپ شىقتى.

كورەر جارىعى بار ەكەن. ءبىر جارىم جاسار مەيىرجان بۇگىنگى كۇنى الماتىدا ەم قابىلداۋدا. ەڭ باستىسى -  امان قالدى. ال جۇرەكتى جىگىت دانياردىڭ باتىل قادامىن توتەنشەلىكتەر ەلەۋسىز قالدىرماي، «ەرلىگى ءۇشىن» مەدالىمەن ماراپاتتادى. ۇستازدارى دا وقۋشىلارىن ماقتان تۇتادى.

ساليما ءسالىموۆا، م. مامەتوۆا اتىنداعى گۋممانيتارلىق كوللەدجى ديرەكتورىنىڭ ورىنباسارى:

- مۇنداي قادامعا باراتىن ۇل ەرتەڭ مەملەكەتشىل تۇلعا، ەلگە ۇلكەن ازامات، ەلىن قورعايتىن باتىر، ءوزىنىڭ وتباسىندا تاماشا وتاعاسى بولاتىنىنا ءبىز كامىل سەنەمىز.

ال دانيار ءوزىنىڭ بۇل ارەكەتىن ەرلىك دەپ ەسەپتەمەيدى. «مۇنداي ادامگەرشىلىك قاسيەت ءار ادامنىڭ بويىنان تابىلۋى ءتيىس»، - دەيدى ول.

دانيار قاۋىشقان، م. مامەتوۆا اتىنداعى گۋممانيتارلىق كوللەدج ستۋدەنتى:

- ويىمدا ەشتەڭە بولعان جوق، بار ويىم سول بالانى الىپ قالۋ بولدى. ءبىرىنشى كىرگەنىمدە تاپپادىم، ەكىنشى كىرگەندە شىعارىپ الدىم بالانى. بۇل مەنىڭ ادامگەرشىلىك پارىزىم دەپ سانايمىن. ءبىراق ەرلىك دەپ ساناپ وسىلاي ماراپاتتاپ جاتقاندارىنا ۇلكەن راحمەت.

دانيار بولاشاق دەنە تاربيەسى ءپانىنىڭ ءمۇعالىمى. ءارى بوكستان سپورت شەبەرى. قازاقتىڭ باتىر قىزى مانشۇك اتىنداعى وقۋ ورنىندا ءبىلىم الىپ جۇرگەن ول قاشاندا قاھارمان بابالاردىڭ ءىزىن جالعاۋدى باستى پارازى سانايدى.

www.24.kz