ەلوردادا «استانا - سپورتتىق قالا» شاراسى ءوتتى - فوتو
استانا قالاسىنىڭ تۋريزم، دەنە تاربيەسى جانە سپورت باسقارماسى ەلوردادا سالاۋاتتى ءومىر سالتىن ۇستانىپ، بەلسەندى دەمالۋدى ۇناتاتىن جۇرتشىلىققا ارناپ قالانىڭ بارلىق دەرلىك دەمالىس ورىندارىندا سپورتتىق-بۇقارالىق شارالار وتكىزەدى.
ولار «جەرۇيىق»، «اراي»، «استانالىق» «عاشىقتار» ساياباعى، پرەزيدەنتتىك ساياباق، وتان قورعاۋشىلار ساياباعى، «اتاتۇرىك» ساياباعى، ستۋدەنتتىك ساياباقتا جانە ەسىل جاعالاۋىندا ۇيىمداستىرىلادى.
مۇنداي شارالاردىڭ ءبىرى - «استانا - سپورتتىق قالا» شاراسى وتكەن دەمالىس كۇندەرى قالا ساياباقتارىندا وتكىزىلدى. شاراعا كەلگەن كوپشىلىك بوكستان ارنايى كورسەتىلىمدەر تاماشالاپ، تەننيستەن شەبەرلىك ساباقتارىنا قاتىستى، روليك، ۆەلوسيپەد تەۋىپ، ستريتبول، ۇستەل تەننيسى، دوپ ويناۋدان باق سىنادى.
بۇقارالىق سپورتتى دامىتۋ مەملەكەتتىك ساياساتتىڭ باسىم باعىتتارىنىڭ ءبىرى رەتىندە ايقىندالعان. ەلباسى نۇرسۇلتان نازاربايەۆ ەل حالقىنا جولداۋىنا ۇلت دەنساۋلىعى ءۇشىن سالاۋاتتى ءومىر سالتى مەن سپورتتىڭ ماڭىزى تۋرالى ايتا كەلە، قازاقستاندىقتاردى بۇقارالىق سپورتپەن قامتۋ كورسەتكىشىن كەم دەگەندە 30 پايىزعا جەتكىزۋ تۋرالى مىندەت قويعان بولاتىن.
بۇگىندە استانانىڭ سپورتتىق ينفراقۇرىلىمى حالىقارالىق دەڭگەيدەگى سپورت سايىستارىن وتكىزۋمەن قاتار، حالىقتىڭ سپورتپەن بەلسەندى اينالىسۋىنا مۇمكىندىك بەرەدى. الەۋمەتتىك ساۋالنامالارعا جۇگىنسەك، ءاربىر ءتورتىنشى استانالىق دەنە شىنىقتىرۋمەن اينالىسادى. قالادا رەسپۋبليكالىق، حالىقارالىق دەڭگەيدەگى جارىستار تۇراقتى ۇيىمداستىرىلادى.
