قازاقپارات ح ا ا اگەنتتىگىندە جارىق كورگەن اقپاراتتان كەيىن ايەلدى قاعىپ مەرت قىلعان ۆەلوسيپەدشى تابىلدى

تاراز. قازاقپارات - تاراز قالاسىنىڭ ورتالىعىندا بالاسىمەن كەلە جاتقان ايەلدى قاعىپ كەتىپ، وقيعا ورنىنان بوي تاسالاعان ۆەلوسيپەدشى پوليتسياعا كىناسىن مويىنداپ ءوزى كەلدى.

 جامبىل وبلىسى ءى ءى د حابارلاعانداي، «قازاقپارات» ح ا ا جاڭالىقتارىندا جاريالانعان حابارلامادان كەيىن ايىپتى ايەل پوليتسياعا ءوزى كەلگەن. ول تاراز كوللەدجدەرىنىڭ بىرىندە وقيتىن 19 جاستاعى ستۋدەنت قىز بولىپ شىقتى.

6 -ماۋسىم كۇنى ول جاياۋ جۇرگىنشىلەر جولىمەن تومەن قاراي ۆەلوسيپەدىمەن اسا جوعارى جىلدامدىقپەن كەلىپ، استانا تۇرعىنى، 32 جاستاعى ساندۋعاش تۇياقبايەۆانى قاعىپ كەتكەن. باسىنان جاراقاتتانعان ول اۋرۋحانادا قازا تاپتى.

 وقيعا بويىنشا، ۆەلوسيپەدشى ەكپىنمەن كەپ سوققان كەزدە ءبىر جاستاعى بالاسىن قۇتقارماق بولعان ايەل باسپەن جەرگە قۇلاپ، ەسىنەن تانىپ قالعان. ميى شايقالعان ول №1 -قالالىق اۋرۋحاناسىنا جەتكىزىلىپ، دەرەۋ وتا جاسالعانىمەن 8 -ماۋسىمدا ەسىن جيماستان جان تاپسىردى.

ساندۋعاش تۇياقبايەۆانىڭ ارتىندا ءۇش بالاسى جەتىم قالدى.

اتالعان فاكتى بويىنشا ق ر ق ك 104-بابىنىڭ 1-بولىگى (ابايسىزدا كىسى ءولتىرۋ) بويىنشا قىلمىستىق ءىس قوزعالدى، ول باپ ءۇش جىلعا دەيىن باس بوستاندىعىنان شەكتەۋدى كوزدەيدى. سوتقا دەيىنگى تەرگەۋ امالدارى جۇرگىزىلۋدە.

قازاقستاندا جول-كولىك قوزعالىسى قاعيداسىنىڭ جاڭا رەداكسياسى كۇشىنە ەندى، وعان سايكەس ۆەلوسيپەدپەن جۇرگىنشىلەر جولىندا جۇرۋگە تىيىم سالىنعان.