گ. ءابدىقالىقوۆا سينگاپۋرلىق عالىمدارمەن كەزدەستى - فوتو
«ءبىزدىڭ ەلدەرىمىزدى دوستىق قارىم-قاتىناس بايلانىستىرادى. تاۋەلسىزدىكتىڭ العاشقى كۇندەرىنەن لي كۋان يۋ ءبىزدىڭ پرەزيدەنتىمىزبەن وتە جىلى بايلانىس ورناتتى. ءبىز، مەنىڭ ارىپتەستەرىم لي كۋان يۋدىڭ «ءۇشىنشى الەمنەن ءبىرىنشى الەمگە» اتتى كىتابىن زور قىزىعۋشىلىقپەن وقىپ شىقتى. ارينە، ونىڭ قازاسىن كۇيزەلىسپەن قابىلدادىق»، - دەدى مەملەكەتتىك حاتشى.
گ. ءابدىقالىقوۆا ءوز سوزىندە قازاقستان سينگاپۋردىڭ بارلىق سالاداعى تاجىريبەسىن جەتە زەردەلەپ وتىرعاندىعىن باسا اتاپ ءوتتى.
«ءبىزدىڭ ەكونوميكا، ءبىلىم، مادەنيەت سالاسىنداعى ارىپتەستەرىمىز سىزدەردىڭ تاجىريبەلەرىڭىزدى زەردەلەۋ ءۇشىن بىرنەشە مارتە بارىپ قايتتى. نازاربايەۆ ۋنيۆەرسيتەتىنىڭ العاشقى تۇلەكتەرىنىڭ سالتاناتتى شاراسى كۇنىندە كەلۋىڭىزدىڭ دە سيمۆولدىق ءمانى بار. لي كۋان يۋ اتىنداعى مەملەكەتتىك ساياسات مەكتەبى مەن نازاربايەۆ ۋنيۆەرسيتەتى جوعارى مەملەكەتتىك ساياساتى مەكتەبى تىعىز قارىم- قاتىناس ورناۋدا»، - دەدى ول.
سونىمەن قاتار مەملەكەتتىك حاتشى اڭگىمەلەسۋشىلەرگە مەملەكەت باسشىسى ۇسىنعان 5 ينستيتۋتتىق رەفورمانى، سونىڭ ءبىرى - ەكونوميكالىق باعدارلامالاردى ساپالى ىسكە اسىرۋدى قامتاماسىز ەتەتىن جانە مەملەكەتتىك قىزمەتتەردى ۇسىناتىن زاماناۋي، كاسىبي جانە دەربەس مەملەكەتتىك اپپاراتتى قالىپتاستىراتىن رەفورمانى ىسكە اسىرۋ بارىسى تۋرالى حاباردار ەتتى.
كەزدەسۋ سوڭىندا گ. ءابدىقالىقوۆا نازاربايەۆ ۋنيۆەرسيتەتىنىڭ جوعارى مەملەكەتتىك ساياسات مەكتەبى مەن سينگاپۋر ۇلتتىق ۋنيۆەرسيتەتىنىڭ لي كۋان يۋ اتىنداعى مەملەكەتتىك ساياسات مەكتەبىنىڭ ءوزارا ءتيىمدى سەرىكتەستىك قارىم-قاتىناستارى قازاقستاننىڭ ادامي الەۋەتىن ودان ارى ساپالى دامۋىنا سەپتىگىن تيگىزەتىندىگىنە سەنىم ءبىلدىردى.
