قىتايدا ءىستى بولعان قازاق قىزىن ەلگە دەپورتاتسيالاۋ ازىرگە مۇمكىن ەمەس

 استانا. قازاقپارات - قىتايدا ەسىرتكى تاسىمالى ءۇشىن ءىستى بولىپ جاتقان جانە ءومىر بويى باس بوستاندىعىنان ايىرىلۋى مۇمكىن اقجارقىن تۇرلىبايدى قازاقستانعا دەپورتاتسيالاۋ مۇمكىندىگى ازىرگە بولا قويمايدى.

 بۇل تۋرالى بۇگىن ق ر سىرتقى ىستەر مينيسترلىگىنىڭ رەسمي وكىلى التاي ابيبۋللايەۆ ءمالىم ەتتى.

«ەگەر قازاقستان ازاماتى وسى مەملەكەتتە باس بوستاندىعىنان ايىرىلسا، قازاقستان مەن قىتاي اراسىندا تيەسىلى كەلىسىم بار ما، الدە ول ازاماتتى ەلگە دەپورتاتسيالاۋ مۇمكىندىگى جوق پا دەگەن ساۋالدار كەلىپ ءتۇستى. وسى سۇراققا جاۋاپ رەتىندە ايتارىم: 2011 -جىلى ق ر مەن ق ح ر اراسىندا سوتتالعان ازاماتتاردى ءوزارا الماسۋ جونىندە كەلىسىمگە قول قويىلعان بولاتىن. كەلەسىمدى 2013 -جىلى قازاقستان پارلامەنتى راتيفيكاتسيالادى. ءار كەلىسىم حالىقارالىق تاجىريبەگە سايكەس، ديپلوماتيالىق ۇدەرىستەرگە وراي، ەكى تاراپتىڭ راتيفيكاتسيالانعانىنان كەيىن تيەسىلى ديپلوماتيالىق ارنالار ارقىلى راتيفيكاتسيالىق نوتالارمەن الماسقاننان كەيىن كۇشىنە ەنەدى. سوندىقتان قازىرگى تاڭدا بۇل راتيفيكاتسيالاۋ ماسەلەسىن قىتاي تاراپى قاراستىرۋدا. ءبىز قازاقستان تاراپىنان ەشقانداي قىسىم جاساي المايمىز. ءبىراق ديپلوماتيالىق ارنالار ارقىلى، ساياسي دەڭگەيدە وسى كەلىسىمدى راتيفيكاتسيالاۋ جونىندە ءوز ءوتىنىشىمىزدى عانا بىلدىرە الامىز. ەگەر بۇل كەلىسىم كۇشىنە ەنگەن كۇنى سوتتالعان ازاماتتارمەن الماسۋ جونىندەگى تەتىكتەرمەن ودان ارعى قادامدار جايلى باس پروكۋراتۋرا ارقىلى ەگجەي- تەگجەيلى اقپارات الۋعا بولادى» ، - دەيدى ول.

ايتا كەتەيىك، قىتايدا ەسىرتكىمەن ۇستالعان 20 جاسار قازاق قىزى اقجارقىن تۇرلىبايعا قاتىستى سوت ۇكىمى شىقتى. ءبىرىنشى ينستانتسيا ونى ءومىر بويى باس بوستاندىعىنان ايىرۋ تۋرالى ۇكىم شىعارعان بولاتىن.

«ارينە، بۇل سوت ۇكىمىمەن اقجارقىن بولسىن، ونىڭ تۋعان- تۋىستارى، زاڭگەرلەرى مەن قازاقستان تاراپى جالپى كەلىسپەيتىندىگىن اتاپ وتكىم كەلەدى»،- دەدى ا. ابيبۋللايەۆ، - قازاقستان ازاماتىنىڭ ءومىر بويى باس بوستاندىعىنان ايىرۋ شەشىمىنە اقجارقىننىڭ ءوزى دە جانە ادۆوكاتتار كەلىسپەگەندىكتەن، بۇل ماسەلەنى كەلەسى سوت دەڭگەيىندە قاراستىرۋ كوزدەلىپ وتىر. سوت شەشىمى ءالى كۇشىنە ەنگەن جوق. 10 كۇننىڭ ىشىندە ادۆوكاتتار اپەللياتسيالىق شاعىم بەرۋگە قۇقىعى بار. سوندىقتان، كۇشىنە ەنبەگەن سوت ۇكىمىن اپەللياتسيالىق ساتىدا قاراستىرۋ مۇمكىندىگى كەلەسى جارتى جىلدىڭ ىشىندە بولادى. وكىنىشتىسى، وسى جارتى جىل ىشىندە اقجارقىن اباقتىدا وتىرۋعا تيىستى» .

ەسكە سالا كەتەيىك، قىتايعا شىققان العاشقى ساپارىندا 20 جاستاعى قازاقستاندىق بويجەتكەن اقجارقىن تۇرلىباي 3 - ناۋرىزدا گۋاڭجۋ اۋەجايىندا ۇستالعان بولاتىن. ونىڭ سومكەسىنەن قىتاي پوليتسەيلەرى ەسىرتكى تاپتى. قورعاۋشى تاراپ ەسىرتكى زاتتارىن قىتايدا اقجارقىننىڭ سومكەسىنە بىرەۋ سالىپ جىبەرۋى مۇمكىن ەكەنىن ايتادى.

 

 اۆتور: جاسۇلان جولدىبايەۆ