ۇكىمەت ەكونوميكالىق ءوسىمى تومەن مونوقالالاردىڭ اربىرىنە جەكە جوسپار جاسايدى
بۇگىن پارلامەنت سەناتىندا ق ر ۇكىمەتىنىڭ جانە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ 2014 - جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبىن تالقىلاۋ بارىسىندا دەپۋتاتتار ساۋالىنا جاۋاپ بەرگەن ۇلتتىق ەكونوميكا ءمينيسترى ەربولات دوسايەۆ ءمالىم ەتتى.
تالقىلاۋ بارىسىندا سەناتور ەرلان نىعماتۋلين مونوقالالار ماسەلەسىنە نازار اۋدارا كەلە، باعدارلاماعا سايكەس 38 ميلليارد تەڭگە يگەرىلۋى ءتيىس ەكەنىن، ال شىن مانىندە بۇل 18,5 ميلليارد تەڭگەنى قۇراعانىن جەتكىزدى.
سونىمەن قوسا، 27 مونوقالانىڭ 14 ىندە ءوندىرىستىڭ ءوسۋى ورنىنا تومەندەگەن، ال ون ەكىسىندە باعدارلامانى جۇزەگە اسىرۋ شارالارى قابىلدانباعان.
« ەسەپكە قاراعاندا، بۇل باعدارلاما بويىنشا 200 مىڭ ادام جۇمىسقا ورنالاسقان. الايدا، ولاردىڭ 25 پايىزى مىندەتتى زەينەتاقى اۋدارۋدا راستالمايدى. بۇل قالاي؟ ستاتيستكياداعى كەمشىلىك پە؟» - دەدى ە. نىعماتۋلين.
ءوز كەزەگىندە ەسەپ كوميتەتىنىڭ ءتوراعاسى قوزى- كورپەش جاڭبىرشين شىندىعىندا مۇنداي فاكتىلەر انىقتالعانىن العا تارتادى. « ءبىزدىڭ ويىمىزشا، بۇل ءتيىمسىز نەمەسە ساپاسىز جوسپارلاۋدان ورىن الىپ وتىر. قانداي دا ءبىر ماقساتقا قاراجات بولىنسە، ول ماقساتقا قول جەتكىزىلمەسە، وندا قاراجات نە يگەرىلمەي قالادى، نە بولماسا ءتيىمسىز يگەرىلەدى. بۇل - ولقىلىقتاردىڭ ءبىرى. ال جۇمىس ورىندارىنا كەلسەك، ولار ەسەپتەردە قۇرىلدى دەپ كورسەتىلەدى. ال مىندەتتى زەينەتاقى جارنالارىنىڭ اۋدارىلماۋى نەگىزىنەن بۇنىڭ « بوس» ماسەلە ەكەنىن اڭعارتادى. ءبىز بۇعان تالداۋلار جاساپ كوردىك، ازىرشە وسىمەن شەكتەلەمىن»، - دەدى كوميتەت باسشىسى.
ال ۇلتتىق ەكونوميكا ءمينيسترى ەربولات دوسايەۆ كوتەرىلگەن پروبلەمالاردىڭ شىندىعىندا ورىن الىپ وتىرعانىن ايتىپ، دەگەنمەن ماسەلەنىڭ نەگىزى جۇيە قۇرۋشى قالالارداعى كاسىپورىنداردىڭ بانكروتتىق جاعدايىنا نازار اۋدارتتى. ونداي زاۋىتتار مەن كاسىپورىندار ءالى دە ناقتى وندىرىسكە شىعا الماي وتىر.
« جىل باسىنان بەرى مونوقالالاردى دامىتۋ باعدارلاماسى وڭىرلەردى دامىتۋ باعدارلاماسىنا قوسىلدى. ءبىز سوعان وراي، ەكونوميكالىق ءوسىمى قۇلدىراپ بارا جاتقان مونوقالالار ماسەلەسىن رەتتەۋدى كوزدەپ وتىرمىز. ءاربىر قالا بويىنشا جەكە جوسپارلار جاسالادى. مەنىڭ ويىمشا، كۇزگە قاراي ءبىز قابىلدانۋى قاجەتتى شارالاردى تانىستىراتىن بولامىز» ، - دەدى ە. دوسايەۆ.
اۆتور: قانات مامەتقازى ۇلى
