قازاقستاندىق فيزيك ورتالىق ازياداعى «ەڭ كوپ ماقالا جاريالاعان عالىم» اتاندى
قازاقستان، قىرعىزستان مەن تاجىكستاننىڭ 9 عالىمى جۇلدەنىڭ لاۋرەاتتارى اتاندى. ماراپاتتاۋ ءراسىمى 12- ماۋسىمدا الماتىدا ءوتتى. گۋميليەۆ اتىنداعى ە ۇ ۋ پروفەسسورى، اكادەميك راتباي مىرزاقۇلوۆ استروفيزيكا، گراۆيتاتسيا تەوريالارى مەن قاراڭعى ماتەريالار جايلى جۇمىستارىمەن تانىمال.
ماراپاتتالعان قازاقستاندىق 5 عالىمنىڭ ۇشەۋى فيزيكا سالاسىندا ەڭبەك ەتەدى. قازاق-بريتان تەحنيكالىق ۋنيۆەرسيتەتىنىڭ پروفەسسورى انۋاربەك مەيىرمانوۆ فيزيكالىق قۇبىلىستاردى ماتەماتيكالىق مودەلدەۋ سالاسىنداعى ەڭبەگى ءۇشىن ماراپاتتالدى. فيزيك يۋري تۋلەۋشيەۆ الماتىداعى يادرولىق فيزيكا لابوراتورياسىن باسقارادى، ول جوعارى وتكىزگىشتىك سالاسىنداعى ەڭبەكتەرىمەن بەلگىلى. قاراعاندى ورگانيكالىق سينتەز جانە كومىر حيمياسى ينستيتۋتىنىڭ عالىمدارى ورالعازى نۇركەنوۆ پەن سەرىك فازىلوۆ تا Top Springer Author 2015 لاۋرەاتتارى اتاندى.
سونىمەن قاتار، قىرعىزستاندىق گەولوگ يساكبەك تورگويەۆ پەن قاناتبەك ءابراحماتوۆ، سەيسمولوگ ۆلاديسلاۆ باتاليەۆ لاۋرەات اتاندى. تاعى ءبىر جۇلدە تاجىكستاننان كەلگەن بەلگىلى ماتەماتيك، اكادەميك جانە تاجىك پارلامەنتىنىڭ دەپۋتاتى ميرگاند شابوزوۆقا بۇيىردى.
ايتا كەتەيىك، 2011-جىلى قازاقستانداعى ءبىلىم جانە عىلىم مەكەمەلەرىنىڭ بارلىعى SpringerLink باسىلىمىنىڭ عىلىمي ماقالالار بازاسىنا كىرۋگە مۇمكىندىك الدى. قازاقستاندا PhD دوكتورلارى دارەجەلەرىن قورعاۋ ءۇشىن Thomson Reuters جانە Scopus حالىقارالىق بازاسىنداعى رەيتينگتە ورنى بار شەتەلدىك عىلىمي جۋرنالداردا ءبىر نەمەسە ودان دا كوپ ماقالا جاريالاۋ كەرەك. بۇل تالاپ ءبىلىم ساپاسىن كوتەرۋ ماقساتىندا 2011-جىلى ەنگىزىلدى.
