قازاقستاندىق ونەر جۇلدىزدارى الەم چەمپيوناتىندا بەسىنشى ورىن الدى - فوتو

 استانا. قازاقپارات - ماسكەۋدە ونەر جۇلدىزدارى اراسىندا ۇيىمداستىرىلعان الەم چەمپيوناتى نەمەسە «ارت- فۋتبول» جوباسى مارەسىنە جەتتى. ەلىمىزدىڭ نامىسىن قورعاعان «الاتاۋ» كومانداسى جارىستى بەسىنشى ورىنمەن اياقتادى.

قازاقستاندىق ساحنا ساڭلاقتارى توپتىق كەزەڭدە قىرعىزستان، گەرمانيا جانە وڭتۇستىك كورەيا ەلدەرىنەن كەلگەن كوماندالارعا قارسى وينادى. ءبىرىنشى ويىندا «ايىر قالپاقتى» ەلدەن كەلگەن ارىپتەستەرىمەن 2:2 ناتيجەسىمەن تەڭ تارقاسسا، نەمىس ۇجىمىنان 0:2 ەسەبىمەن ۇتىلىپ قالدى. ال وڭتۇستىك كورەيادان كەلگەن كوماندانى 3:1 ەسەبىمەن جەڭدى. توپتا ەكىنشى ورىن العان وتانداستارىمىز 5-8 ورىندارعا تالاسۋعا مۇمكىندىك الدى.

5-8 ورىندارعا تالاساتىن «Super Stars» كەزەڭىنىڭ جارتىلاي فينالىندا قازاقستاندىق ونەر جۇلدىزدارى نيدەرلاند ەلىنەن كەلگەن ارىپتەستەرىنەن 2:0 ەسەبىمەن باسىم ءتۇستى. ال بۇگىن بەسىنشى ورىن ءۇشىن وتكەن ويىندا وتانداستارىمىز سلوۆەنيا ەلىنەن كەلگەن كوماندانى 4:1 ەسەبىمەن ويسىراتا جەڭدى.

2015 -جىلعى الەم چەمپيوناتىندا يزرايل ەلىنىڭ ونەر جۇلدىزدارى چەمپيون اتاندى. ولار الاڭ يەلەرىن پەنالتي سەرياسىندا 4:5 ەسەبىمەن جەڭدى. ءۇشىنشى ورىن ءۇشىن وتكەن ويىندا رۋمىنيادان كەلگەن كوماندا نەمىستەردىڭ قاقپاسىنا جاۋاپسىز ءتورت دوپ توعىتتى.

  ايتا كەتەيىك، قازاقستاندىق ونەر جۇلدىزدارى وتكەن جىلى دا بۇل دوداعا قاتىسقان بولاتىن. الەم چەمپيوناتى نەمەسە «ارت- فۋتبول» دەپ اتالاتىن جارىس -  الەمدىك دەڭگەيدەگى قايىرىمدىلىق اكتسياسى نەگىزىندە ۇيىمداستىرىلىپ كەلەدى. انشىلەر دوپ تەۋىپ قانا قويماي، بوس كەزدەرىندە ءتۇرلى كونسەرتتىك ءىس- شارالار دا ۇيىمداستىردى. ودان تۇسكەن قاراجات ناۋقاس بالالاردى ەمدەۋگە جۇمسالادى.

massaget.kz