كومەتاعا قونعان زوند جەرمەن بايلانىسقا شىقتى

 استانا. قازاقپارات - تاريحتا العاش رەت كومەتا بەتىنە ءساتتى قونعان «فيلا» زوندى قىزمەتىن ۋاقىتشا توقتاتقان جەتى ايدان كەيىن جەرگە سيگنال جىبەردى.

«فيلا» وتكەن جىلدىڭ قاراشا ايىندا چۋريۋموۆا- گەراسيمەنكو كومەتاسىنا قونعان. زوند زەرتتەۋ جۇرگىزىپ، جەرگە 60 ساعات بويى اقپارات جىبەرىپ تۇرعان. كەيىن ونىڭ قۋاتى تاۋسىلىپ، جۇمىسى توقتاعان.

عالىمدار «فيلا» كومەتا كۇنگە جاقىنداعاندا جۇمىسىن جالعاستىرىپ، زوند بەتىندەگى كۇننەن قۋات الاتىن باتارەيالار قايتا زاريادتالادى دەپ ۇمىتتەنگەن. زوندتىڭ جەرمەن قايتا بايلانىسقا شىعۋى عالىمداردىڭ ءۇمىتىن اقتادى. بايلانىس 85 سەكۋندقا سوزىلدى. بۇل ۋاقىتتا زوند 300 فايل جىبەرگەن.

قازىر ماماندار زوندتى كومەتاعا جەتكىزىپ، ەندى ونىڭ وربيتاسىندا تۇرعان «روزەتتا» عارىشتىق اپپاراتىنىڭ باعىتىن وزگەرتۋ جۇمىستارىن جاساپ جاتىر. ماماندار بۇل اپپاراتتىڭ جەرمەن بايلانىسىن ۇزارتۋعا مۇمكىندىك بەرەدى دەپ سانايدى.

«ازاتتىق»

***

قۇيرىقتى جۇلدىز، كومەتا -  كۇن جۇيەسىنىڭ كىشى دەنەسى؛ اسپاندا وقتا-تەكتە تۇماندانعان نىسان تۇرىندە بايقالىپ تۇرادى. قۇيرىقتى جۇلدىزدىڭ باسى يادرو ءبولىپ شىعاراتىن گاز بەن توزاڭنان تۇزىلەدى. (مۇز، مەتان جانە بۋدان) كۇنگە جاقىنداعان كەزدە بۋلانىپ كەتەدى. قازىرگى تاڭدا 400 گە جۋىق قىسقاكەزەڭدى كومەتالار انىقتالعان. كومەتانىڭ قۇيرىعىنىڭ فورماسى مەن ۇزىندىعىنا بايلانىستى اجىراتىلادى. كەيبىرەۋىنىڭ قۇيرىعى بۇكىل اسپان كەڭىستىگىندە سوزىلىپ جاتادى. مىسالى 1944 - جىلى انىقتالعان كومەتانىڭ قۇيرىعى 20 ميلليون ك م. ۇزىندىقتا بولعان. سونداي- اق كومەتادان قۇيرىقتىڭ ءبولىنۋ جاعدايلارى دا تىركەلگەن.