بابالار ءسوزى: جالاڭتوستىڭ ءۇش قورىعى تۋرالى اڭىز
بۇل جوبا اياسىندا «بابالار ءسوزى»، «قازاق حاندارى»، «ەجەلگى قالالار تاريحى»، «حالىق قازىناسى» قاتارلى جاڭا ايدارلار اشىلدى.
***
شاپقىنشىلىق كەزىندە جوڭعارلار قازاق جەرىنىڭ مالعا جايلى شۇرايلى تۇستارىن جايلاپ قونىستانىپ الىپتى. ۇلكەن قورىق دەپ اتالاتىن جەردە جاتقان جاۋ اسكەرلەرىنە نە ساۋىتى جوق، نە نايزادان باسقا قارۋى جوق اق كويلەكتى ءبىر باتىر ويدا جوقتا جالعىز ءوزى جاۋعا تيەدى. جوڭعارلاردىڭ اتقان وقتارى، شاپقان قىلىشتارى جاڭاعى باتىرعا دارىماپتى. اۋليە باتىردىڭ ارۋاعىنان قورىققان جوڭعارلار ۇلكەن قورىقتى تاستاي قاشىپتى. ورتا قورىققا كەلىپ پانالاعان جاۋ اسكەرلەرى جاڭاعى باتىردىڭ جالاڭتوس ەكەنىن اڭگىمەلەي ايتىپتى.
ءسويتىپ وتىرعاندا الگى جالاڭتوس ورتا قورىققا دا قىرعيداي ءتيىپ قۋىپ شىعادى. بارلىق جوڭعارلار جينالىپ كەلىپ كىشى قورىقتا باس قوسىپتى. سول ساتتە جاۋدىڭ باتىرىنا ءبىر حابارشى جىگىت كەلىپ: «جالاڭتوس باتىر وسىندا كەلە جاتىر» دەگەن حابار ايتىپتى. سونى ەستىگەن قالماق باتىرى: «ۇلكەن قورىقتى بەردىك، ورتا قورىقتى بەردىك، كىشى قورىقتى دا ءبارىبىر الماي قويماس. امان- ساۋ تۇرعانىمىزدا كەتكەنىمىز ءجون بولار، بۇل ءۇش قورىقتىڭ ۇشەۋى دە جالاڭتوستىكى ەكەن عوي»، - دەپ اسكەرلەرىن باستاپ قايتىپ كەتىپتى دەيدى. سودان بەرى جاڭاعى قورىقتار «جالاڭتوستىڭ ءۇش قورىعى» اتالىپ كەتىپتى.
