جەر جىرتۋشىلار اراسىندا رەسپۋبليكالىق جارىسى ءوتتى

استانا. قازاقپارات - بەلارۋس ەلىندە جەر جىرتۋشىلار اراسىندا جارىس ءوتتى. ەگىس القابىنداعى ەڭبەك وزاتتارىن انىقتايتىن دودا جىلدا وتەدى.

جەر جىرتىپ، جانار- جاعارمايدى ۇنەمدەي وتىرىپ، ەگىستەن مول ءونىم الۋ -  ناعىز ەڭبەك ەرىنىڭ قولىنان كەلەتىن كۇردەلى شارۋا. سوندىقتان ءداستۇرلى شارانىڭ باستى ماقساتى ينجەنەر- مەحانيكتەردىڭ بەدەلىن كوتەرۋ بولماق.

ەڭبەك ەرلەرىنە ۇيىتقىعان جەل دە، اپتاپ ىستىق تا، بۇلىڭعىر كۇن رايى دا كەدەرگى ەمەس. سەرگەي سولەينيك بالا كەزىنەن ومىرلىك كاسىبىن تاڭداپ العان. جەر جىرتۋشىلار بايقاۋىنىڭ ەڭ جاس قاتىسۋشىسى مەحانيزاتور جۇمىسىندا ۇساق- تۇيەك بولمايتىندىعىن ايتادى.

تەحنيكانىڭ جىلىگىن شاعىپ، مايىن ىشكەن ول كوكتەمدە جەر جىرتىپ، جازدا ءدان ەگىپ، كۇزدە ەگىنىن ورادى.

سەرگەي سولەينيك مەحانيزاتور:

- تەحنيكا تارتىپ تۇرادى. تەمىر- تەرسەكتى شۇقىلاعاندى جانىم سۇيەدى، جۇرگىزگەندى ۇناتامىن. مەيلى كومباين، تراكتور بولسىن، تالعامايمىن. جەر جىرتقاندا، القاپتى دايىنداعاندا، ءار نارسەنىڭ ءوز جاۋاپكەرشىلىگى بار. نە ەكسەڭ، سونى وراسىڭ. ەگىن ورعاندا بىردە-ءبىر ءدان قالماعانى ابزال.

سايىسكەرلەرگە بەرىلگەن ءبىرىنشى تاپسىرما -  تەوريالىق ەمتيحان تاپسىرۋ. ەكىنشى كەزەڭ -  تەحنيكانى القاپ جۇمىسىنا دايىنداۋ. جەر جىرتۋعا شىعاردىڭ الدىندا بارلىق تەتىكتەردى، اسىرەسە سوقانى تەكسەرۋ قاجەت. ادەتتە جۇمىس كۇنى بۇعان شامامەن ءبىر ساعات كەتەدى.

ستانيسلاۆ كارپوۆيچ، قازىلار القاسىنىڭ ءتوراعاسى:

- شىنىندا ءبارى دە قوبالجيدى. ءوزىم 2006 -جىلدان بەرى قازىلار القاسىنىڭ ءتوراعاسىمىن، ءبىراق جىل سايىن ءبارىن جاڭاشا سەزىنەمىن. سەبەبى جوعارى كاسىبي شەبەرلىگىن كورسەتەتىن بۇل ادامدارعا بۇكىل ەل قاراپ وتىرادى.

جەردى بارلىق جاعىنان باپتاۋ كەرەك. تەرەڭدىگى ويداعىداي، تۇزۋلىگى وقتاۋداي بولعانى ءجون. ارينە القاپتا كوپ شارۋا جىلدامدىققا بايلانىستى. بۇل بايقاۋعا بەلارۋستىڭ ەڭ ۇزدىك جەر جىرتۋشىلارى ىرىكتەلىپ الىنعان. ءداستۇرلى سايىسقا بىرنەشە جىل قاتارىنان قاتىسىپ وتىرعاندار دا بار. ولار ءوز ايماعىندا الدىنا جان سالمايتىندار.

ۆورونين الەكساندر، مەحانيزاتور:

- جەر جىرتاسىڭ، ەگىن وراسىڭ، سوسىن ونى جيناۋ باستالادى. كەيدە ۇلگەرمەي جاتاسىڭ. سوندىقتان تراكتورشى ماماندىعىن كولحوزدىڭ ارتتا قالعان كاسىبى دەپ ەسەپتەمەيمىن. ءقازىر تراكتورشىسىز ءومىر قاراڭ.

ۇيىمداستىرۋشىلار كەلەسى بايقاۋدى حالىقارالىق دەڭگەيدە وتكىزۋگە ۋادە بەرۋدە. قازىردىڭ وزىندە ليتۆا، پولشا، رەسەيمەن كەلىسىمدەر بار ەكەن. يگىلىكتى شاراعا باستاما بولعاندار قازاقستاندىقتاردى دا كۇتەتىنىن ايتادى.

www.24.kz