قىزىلوردادا وقۋشىلاردى كاسىپكەرلىك نەگىزدەرىنە وقىتادى - فوتو

قىزىلوردا. قازاقپارات - قىزىلوردادا وڭىرلىك كاسىپكەرلىك پالاتاسى ءبىلىم وردالارىندا «كاسىپكەرلىك نەگىزدەرى» ءپانىن تولىقتاي ەنگىزۋ باعىتىندا جۇمىس جۇرگىزۋدە.

 بۇل رەتتە، كاسىپكەرلەر پالاتاسى وبلىستىق ءبىلىم باسقارماسى جانە «جاستار جەتىستىكتەر» قوعامدىق قورىمەن بىرگە مەكتەپ وقۋشىلارىن كاسىپكەرلىككە باۋلۋ جوباسىن ىسكە اسىرۋدا. جوبانىڭ 1 -كەزەڭىندە وتكەن وقۋ جىلىندا  قىزىلوردا قالاسىنداعى №9 مەكتەپ- گيمنازياسىندا 5-10 -سىنىپ وقۋشىلارىنا ارنالعان «كاسىپكەرلىك نەگىزدەرى» فاكۋلتاتيۆتىك ءپانى ەنگىزىلدى. بۇل تۋرالى وبلىستىق كاسىپكەرلەر پالاتاسىنىڭ باسپا ءسوز قىزمەتى حابارلادى.

جوبانىڭ 2 -كەزەڭى وبلىستىڭ 40 مۇعالىمىنىڭ «كاسىپكەرلىك نەگىزدەرى» كۋرسى بويىنشا بىلىكتىلىكتەرىن كوتەرىپ، «اراي- Sunrisە» لاگەرىندە ۇيىمداستىرىلعان «تابىس جولى» اتتى I جاستار فەستيۆالىمەن جالعاستى.

فەستيۆالدىڭ ماقساتى - ايماقتاعى مەكتەپ وقۋشىلارى مەن كوللەدج ستۋدەنتەرىنەن قۇرالعان كومپانيالار اراسىندا ۇزدىك بيزنەس- جوسپاردى انىقتاپ، جاستاردىڭ بيزنەس- يدەيالارىن قولداۋ.

ايتا كەتۋ كەرەك، بىلىكتىلىگىن ارتتىرعان ۇستازدار ءوز مەكتەپتەرىندە مەكتەپ «كومپانيالارىن» اشىپ، وقۋشىلاردى كاسىپكەرلىكتىڭ قىر- سىرىنا ۇيرەتۋدە.

وبلىستىڭ 23 مەكتەپ كومپانياسى قاتىسقان فەستيۆالعا «پەتروقازاقستان قۇمكول رەسورسيز» ا ق مەن «رايم» ج ش س دەمەۋشىلىك جاسادى.

 بايقاۋ ناتيجەسى بويىنشا  قىزىلوردا قالاسىنىڭ №9 -گيمنازيانىڭ «اتامەكەن» مەكتەپ كومپانياسى 1- ورىندى ەنشىلەسە،  2 -ورىنعا جالاعاش اۋدانى № 123 -مەكتەپتىڭ «بىرلىك» مەكتەپ كومپانياسى، 3 -ورىنعا  قىزىلوردا قالاسى № 173 -ورتا مەكتەپتىڭ «ادەمى-اي» مەكتەپ كومپانياسى، ال 4 -ورىنعا م. مامەتوۆا اتىنداعى  قىزىلوردا گۋمانيتارلىق كوللەدجىنىڭ «التىن قول» كومپانياسى يە بولدى.

جەڭىمپازدار ديپلومدارمەن، قارجىلاي سىيلىقتارمەن، ارنايى سەرتيفيكاتتارمەن ماراپاتتالدى.

«وسىنداي شارالاردىڭ ارقاسىندا وقۋشىلار بيزنەستى جۇرگىزۋدىڭ نەگىزگى قاعيدالارىمەن، ماركەتينگتىك زەرتتەۋ جۇرگىزۋ، بيۋدجەتتى جوسپارلاۋ سىندى ماڭىزدى قادامداردىڭ العىشارتتارىمەن تانىستى. كاسىپكەرلەر پالاتاسىنىڭ اتىنان جەڭىمپازدارعا «شاعىن بيزنەسكە ارنالعان 100 جوبا»، بودو شەفەردىڭ «قارجىلىق تاۋەلسىزدىككە جول» اتتى كىتاپتار مەن قارجىلاي سىيلىقتار تابىس ەتىلدى. الداعى ۋاقىتتا ايماقتىڭ بارلىق مەكتەپتەرىندە «كاسىپكەرلىك نەگىزدەرى» ءپانىن ەنگىزۋ جوسپارلانۋدا»، - دەيدى  قىزىلوردا وبلىسىنىڭ كاسىپكەرلەر پالاتاسىنىڭ ادامي كاپيتالدى جانە الەۋمەتتىك سەرىكتەستىكتى دامىتۋ ءبولىمىنىڭ باسشىسى جاننا سقاقوۆا.