استانادا رەسپۋبليكالىق ەرلەر دەنساۋلىعى ورتالىعىن اشۋ ەرلەر اراسىنداعى بەدەۋلىكتى ازايتۋعا سەپتىگىن تيگىزەدى - م. الشىنبايەۆ
بۇل تۋرالى بۇگىن الماتىدا «ۋرولوگياداعى كىشى ينۆازيۆتى تەحنولوگيالار» تاقىرىبىندا ءوتىپ جاتقان قازاقستان ۋرولوگتارىنىڭ V سەزى بارىسىندا ب. جاربوسىنوۆ اتىنداعى ۋرولوگيا عىلىمي ورتالىعى» اق باسقارماسىنىڭ ءتوراعاسى، مەديتسينا عىلىمدارىنىڭ دوكتورى، پروفەسسور مىرزاكارىم الشىنبايەۆ مالىمدەدى.
ونىڭ ايتۋىنشا ورتالىقتى اشۋ جوباسى دايىن.
«ءبىز ۋرولوگيا سالاسى بويىنشا ەر ازاماتتاردىڭ دەنساۋلىعىن جاقسارتۋدا پيونەر بولعالى تۇرمىز. مەنىڭ ارمانىم - استانادا جاقىن بولاشاقتا «ەرلەر دەنساۋلىعى جانە وتباسىلىق ۇزاق عۇمىر» دەپ اتالاتىن بىرەگەي رەسپۋبليكالىق ورتالىق اشۋ. ەندى ەلىمىزدە ايەلدەردىڭ دەنساۋلىعى جاقسى باقىلاۋعا الىنعان عوي.
ال ءبىراق، ەر ازاماتتارعا قاتىستى وسىنداي ورتالىق اشۋ وتە قاجەت. مۇنداي ورتالىق اشۋدى بۇكىل دۇنيەجۇزىنىڭ ماماندارى قولداپ، قۋاتتاپ وتىر. جاڭا ورتالىقتىڭ قۇرىلىسىنا 5 ميلليارد 700 مىڭ تەڭگە قارجى كەرەك. ەندى جاقىن بولاشاقتا ۇكىمەت دەڭگەيىندە ماسەلە وڭ شەشىمىن تابادى دەگەن سەنىمدەمىن. ورتالىقتى سالۋ جوباسى دايىن»، - دەدى م. الشىنبايەۆ.
ءوز كەزەگىندە ۋرولوگيا سالاسىنىڭ تاعى ءبىر ايتۋلى مامانى - مەديتسينا عىلىمدارىنىڭ دوكتورى، پروفەسسور سۋنيات قۇسىمجانوۆ ەرلەر دەنساۋلىعىنا قاتىستى ورتالىق اشۋ شىنىندا دا ۇلكەن قاجەتتىلىكتەن تۋىنداپ وتىرعاندىعىن جەتكىزدى.
«بۇل - وتە ماڭىزدى باستاما. ويتكەنى ەلىمىزدە ءقازىر ەرلەر اراسىندا بەدەۋلىك ماسەلەسى بەلەڭ الىپ كەلەدى. بۇعان باستى سەبەپتەر - ارينە ەكولوگيا، زياندى ادەتتەر جانە ازىق- تۇلىك ساپاسى. بۇگىندە ەلىمىزدە بەدەۋلىك زاردابىن تارتىپ وتىرعان وتباسىلاردىڭ تەڭ جارتىسىندا ماسەلە ەرلەردىڭ بەدەۋلىگىنە بايلانىستى بولىپ وتىر. سوندىقتان، وسى ماسەلەلەردى شەشۋدە ورتالىقتىڭ الار ورنى ەرەكشە بولعالى تۇر»، - دەدى س. قۇسىمجانوۆ.
ايتا كەتەلىك، سەزد جۇمىسى ودان ءارى جالعاسۋدا. ونىڭ سوڭىندا قازاقستاندا ۋرولوگيا سالاسىنىڭ بولاشاعىنا قاتىستى ارنايى قارار قابىلدانادى.
اۆتور: جاپپاربەرگەن ايبوتا
