قازاقستاندا جاسالعان: شەتەلدىك ماماندار وتاندىق شۇباتتىڭ ساپاسىن جوعارى باعالادى - فوتو
وعان قاتىسۋشىلار الماتى وبلىسىنداعى ورنالاسقان «داۋلەت- بەكەت» كاسىپورنىنا بارىپ، تۇيە شارۋاشىلىعىمەن جەتە تانىستى.
«مەن وسى شارۋاشىلىعىمدى 2001 -جىلى باستادىم. العاشقىدا قولىمدا 20 تۇيە بولدى. بۇگىندە ولاردىڭ سانى 5 مىڭعا جەتتى. كۇنىنە 5 تونناعا دەيىن ءسۇت الامىز. باكتريان جانە ارۋانا تۇقىمىن وسىرەمىز. ارۋانا كۇنىنە 15 ليترگە دەيىن، ال باكتريان 6 ليترگە دەيىن ءسۇت بەرەدى. ءبىراق ونىڭ مايلىلىعى 10 پايىزعا دەيىن جوعارى. سوندىقتان باكتريان تۇيەسىن نەگىزىنەن ەتىنە بولا وسىرەمىز. ءبىز سوڭعى جىلدارى جىلىنا 200 تونناعا جۋىق ەت وتكىزىپ جاتىرمىز. قازىر فەرمادا 85 ادام جۇمىس ىستەيدى. دەنى جاستار»، - دەدى «داۋلەت- بەكەت» ج ش س باس ديرەكتورى سىدىق داۋلەتوۆ.
ونىڭ ايتۋىنشا، كومپانيانىڭ ونىمدەرى ەلىمىزدىڭ تۇكپىر- تۇكپىرىنە جونەلتىلەدى ەكەن. قازاقستان ەۋرازيالىق ەكونوميكالىق وداققا مۇشە بولعالى، كورشى رەسەيگە ايىنا 10 تونناعا جۋىق بالالار يوگۋرتى شىعارىلادى.
«قازىر ءسۇت قولمەن ساۋىلادى. ءبىراق جاقىن بولاشاقتا جاڭا تەحنولوگيالاردى ەندىرۋدى جوسپارلاپ وتىرمىز. بۇعان ءبىر ميلليارد تەڭگەدەن استام قارجى جۇمسايمىز. مەملەكەتىمىزدىڭ ساياساتىنىڭ ارقاسىندا شارۋاشىلىعىمىز جاقسى دامىپ جاتىر. قازىر 4-6 پايىزدىق مولشەرلەمەمەن نەسيە الۋعا بولادى. بۇرىن بۇل تۇسىمىزگە كىرمەيتىن. ودان باسقا، مەملەكەت ءقازىر تۇيەنىڭ ءاربىر ليتر سۇتىنە 55 تەڭگە كومەكقارجى بەرەدى» - دەدى س. داۋلەتوۆ.
كاسىپورىن جەتەكشىسى بۇگىنگى تاڭدا انگليا، جاڭا زەلانديا جانە باسقا دا شەت ەلدەر تاراپىنان شارۋاشىلىقتىڭ ونىمدەرىنە سۇرانىس بار ەكەندىگىن جەتكىزدى. ءبىراق بۇل ءۇشىن ءوندىرىستى ۇلعايتۋ كەرەك.
«وتكەن عاسىردىڭ 50- جىلدارى قازاقستاندا تۇيەلەردىڭ سانى ميلليوننان اسقان. قازىر 150 مىڭعا جەتەر- جەتپەس. سوندىقتان، ءبىز تۇيە شارۋاشىلىعىن دامىتۋىمىز كەرەك. ونىڭ ۇستىنە تۇيە مالى كىرپياز ەمەس، كۇي تالعامايدى»، - دەدى ول.
تۇيە شارۋاشىلىعى بويىنشا 30 دان استام ەلدەن كەلگەن ماماندار مالدىڭ جايىلىمىن، فەرمانى، تسەحتاردى كورىپ، شىعارىلىپ جاتقان ونىمدەردىڭ ساپاسىنا جوعارى باعالادى. سونىمەن قاتار، قازاقستاندا تۇيە وسىرۋگە قاجەتتى تابيعي جاعدايدىڭ بار ەكەندىگىن، سونىڭ ارقاسىندا تابيعي جوعارى ساپالى شۇبات وندىرۋگە بولاتىندىعىن اتاپ ءوتتى.
فەرمانىڭ ماڭىندا، ىلە وزەنىنىڭ جاعاسىندا كونفەرەنتسياعا قاتىسۋشىلارعا ارناپ، بولەك كيىز ۇيلەر تىگىلگەن بولاتىن. وندا شەت ەلدىك قوناقتار قازاقتىڭ ۇلتتىق تاعامدارىنان ءدام تاتتى.
