مەنىڭ ەلىم اتتى اۆتوشەرۋى استاناعا كەلىپ جەتتى - كەسكىن، فوتو

استانا. قازاقپارات - «مەنىڭ ەلىم» اۆتوشەرۋى استاناعا كەلىپ جەتتى.

قازاقستان حالقى اسسامبلەياسىنىڭ 20 -جىلدىعىنا ورايلاستىرىلعان جوبانى «قازاقستان -2050» جالپىۇلتتىق قوزعالىسىنىڭ اياسىندا «Wheels  Brothers MC» اتىراۋ موتوكلۋبىمەن بىرلەسە وتكىزۋدە.

 29 -مامىردا اتىراۋدان باستاۋ العان جوبا وتانىمىزداعى ءتۇرلى ۇلتتار مەن كونفەسسيالار اراسىندا دوستىق قارىم- قاتىناس پەن بايلانىس ورناتۋ جانە كەزدەسۋلەر ارقىلى كوپۇلتتى ەلىمىزدىڭ ءبىرتۇتاستىق يدەياسىن قولداۋدى كوزدەيدى.

 بۇل اكسيا قازاقستان حالقى اسسامبلەياسىنىڭ نەگىزىنە ەلباسى سالعان يدەيالاردى جاس ۇرپاققا اسەرلى، قولجەتىمدى ءارى تۇسىنىكتى تاسىلمەن جەتكىزۋ ىسىنە قازاقستان جاستارىنىڭ بەلسەندى بولىگىن تارتۋعا مۇمكىندىك بەرمەك.

ايتا كەتكەن ءجون، اۆتوموتوشەرۋشىلەر قازاقستاننىڭ 20 دان استام قالالارى (اتىراۋ، ورال، اقتوبە، بايقوڭىر،  قىزىلوردا، تۇركىستان، شىمكەنت، الماتى، ءۇشارال، زايسان، وسكەمەن، سەمەي، پاۆلودار، استانا، زەرەندى، قوستاناي) مەن ەلدى مەكەندەرىن باسىپ ءوتۋدى جوسپارلاۋدا. جولداعى جالپى ۋاقىت 18 كۇن، ال ءجۇرىپ وتەتىن جول 8500 شاقىرىم.

«باستاپقىدا بۇل شەرۋ قازاقستان قالالارىن ارالاپ، دوستارمەن جانە موتوقوزعالىستى سۇيەتىن جاندارمەن كەزدەسۋ ءۇشىن ۇيىمداستىرىلعان ەدى. كەيىن ول جاقسى بىر رەسپۋبليكالىق كولەمدەگى ىس- شاراعا اينالىپ كەتتى. ول ەڭ بىرىنشىدەن، جاستاردىڭ بىرلىگىن نىعايتۋعا باعىتتالعان. بىز ولارعا وسىناۋ ۇلكەن جەرىمىزدە تاتۋ-ءتاتتى، كەلىسىمدە ءومىر ءسۇرۋدى ۇگىتتەيمىز. سەبەبى ونسىز كوركەيمەيمىز»، - دەيدى اۆتوموتوشەرۋدىڭ ۇيىمداستىرۋشىسى اتىراۋداعى «Wheels  Brothers MC» موتوكلۋبىنىڭ جەتەكشىسى ولەگ شمال.

«قازاقستان-2050» جالپى ۇلتتىق قوزعالىسىنىڭ حابارلاۋىنشا، اتىراۋدان اتتانعان شەرۋشىلەر قاتارى وزگە ايماقتارداعى اۆتوموتو قوزعالىس وكىلدەرىمەن تولىعىپ وتىرادى.

 

اۆتور: جاسۇلان جولدىبايەۆ