حالىقارالىق ۇيىم قازاقستاندا يادرولىق وتىن بانكىن قۇرۋدى قولدادى

استانا. قازاقپارات- حالىقارالىق اتوم ەنەرگياسى جونىندەگى اگەنتتىك (ماگاتە) قازاقستان تەرريتورياسىندا يادرولىق وتىن بانكىن قۇرۋدى ماقۇلدادى.

 يادرولىق وتىن بانكىن حالىقارالىق ۋران نارىعىنا شىعۋعا رۇقساتى جوق ەلدەر پايدالانا الادى.

يادرولىق وتىن بانكىن قۇرۋ جوباسى وزگە ەلدەر يراننان كورىپ، ۋراندى ءارى ەنەرگيا الۋعا، ءارى اتوم بومباسىن جاساۋعا جارايتىنداي ەتىپ ءوز بەتىمەن بايىتا باستايدى دەگەن قاۋىپتەن دايىندالعان.

ماگاتە كەڭەسى 11 - ماۋسىمدا قازاقستاندا 90 تونناعا دەيىن ءالسىز بايىتىلعان ۋران قورىن قۇرۋدى ماقۇلدادى. 90 توننا ۋران ءبىر ءىرى قالانى ادەتتەگى رەاكتوردا ءۇش جىل بويى ەلەكتر قۋاتىمەن قامتاماسىز ەتۋگە جەتەدى. ماگاتە باسشىسى يۋكيا امانونىڭ سوزىنشە، وسكەمەندە سالىناتىن يادرولىق وتىن بانكى ەكى جىلدان سوڭ پايدالانۋعا بەرىلەدى.

يادرولىق وتىن بانكىن قۇرۋدى 2006 - جىلى امەريكالىق Nuclear Threat Initiative ۇيىمى ۇسىنعان. امەريكالىق ينۆەستور ۋوررەن باففەت جوبا بويىنشا يادرلىق وتىن بانكىن قۇرۋعا قاجەتتى 150 ميلليون ا ق ش دوللارىنىڭ ۇشتەن ءبىرىن قارجىلاندىرعان.

قالعان قارجىنى ەۋروپا وداعى، كۋۆەيت، بىرىككەن اراب امىرلىكتەرى، نورۆەگيا مەن قازاقستان بولگەن.

«ازاتتىق»