قىتايدان كەلگەن بالۋاندى قاناتىنىڭ استىنا الار كوكىرەگىندە كوزى بار باپكەر بولسا
قىتايدان اتاجۇرتىنا كوشىپ كەلگەن بالۋان بالامنىڭ (قازاقتىڭ ۇلانى ءبارىمىزدىڭ دە بالامىز) بويىنداعى بۇلا كۇشى تاڭداندىردى. كەۋدەسىندە كوزى بار باپكەر بولسا، اياعىن جەرگە تيگىزبەي ىلىپ اكەتىپ، قاناتىنىڭ استىنا الىپ، باپتاۋعا كىرىسىپ كەتەر ەدى. ال ءبىز سپورتتىق رازريادى بولۋى كەرەك، وبلىستىڭ چەمپيونى اتانسىن، رەسپۋبليكالىق، حالىقارالىق تۋرنيرلەردە توپ جارسىن، سوسىن كورەمىزدەن اسپاي وتىرمىز.
بالۋان قايرات تۇرسىناكىمنىڭ «جاس الاشتاعى» سۇحباتى مەن مامانداردىڭ پىكىرىن وقىعاندا ەسىمە ەنۆەر تۇركەلەري ءتۇستى. ءيا، كادىمگى ءبىزدىڭ بەيجىڭ مەن لوندون جازعى وليمپيادا ويىندارىندا التىن مەدالداردى كوسىپ الۋىمىزعا سەپتىگى مولىنان تيگەن - تۇرىك باپكەر تۇركەلەري.
ەنۆەر تۇركەلەري قازاقستانعا كەلگەنگە دەيىن بولگاريادا، تۇركيادا اۋىر اتلەتيكادان باپكەر بولىپ ەڭبەك ەتكەنى بەلگىلى. ءوزىنىڭ ەستەلىگىندە ءۇش دۇركىن وليمپيادا چەمپيونى، الەم بىرىنشىلىگىندە جەتى رەت توپ جارعان، ەۋروپا قۇرلىعىندا 10 رەت جەڭىمپاز اتانعان حاليل مۋتلۋدىڭ مىقتىلىعىن قالاي بايقاعانىن جازدى عوي.
بولگاريانىڭ قىرجالى قالاسىندا قونىستانعان ەتنيكالىق تۇرىكتەردىڭ اراسىندا تالانتتى بالانىڭ جۇرگەنىن تۇركەلەريگە شاكىرتىنىڭ ءبىرى ايتادى. تالاپتى بالانىڭ بولاشاقتا تەك بيىكتەردەن كورىنەتىنىن باعامداعان باپكەر مۋتلۋدى «رازريادىڭ جوق ەكەن»، «حالىقارالىق تۋرنيرلەردە كوزگە تۇسپەپسىڭ» دەپ كەۋدەسىنەن يتەرگەن جوق. كەرىسىنشە، باۋىرىنا تارتتى. مۋتلۋدى قازىر الەم قالاي قۇرمەتتەيدى؟ حاليلدەي تالانتتاردىڭ ارقاسىندا تۇركيانىڭ اۋىر اتلەتيكاسىمەن كەز كەلگەن مەملەكەت ساناساتىن جاعدايعا جەتتى.
تۇركيا اۋىر اتلەتيكاسىن 15 جىلدا الەمدىك ارەناعا جارقىراتا شىعارعان تۇركەلەريدىڭ تالانتتى تاني بىلەتىندىگى ءبىزدىڭ باپكەرلەرگە نەگە جۇعىسپايدى ەكەن دەپ تاڭداناسىڭ. ايتپەسە، تۇركەلەريدىڭ دە قازاق دالاسىندا باپكەرلەرگە كەڭەسشىلىككە جاراپ جۇرگەنىنە 10 جىلدىڭ ءجۇزى بولدى .
قايرات بالۋان «ەركىن كۇرەستەن جولىم اشىلماسا، ارالاس جەكپە- جەككە كەتۋىم مۇمكىن» دەپتى. جالىنداپ تۇرعان جاس بالۋانعا ايتار كەڭەسىم، ەرەجەسىز جەكپە- جەكتەن گورى اۋىر اتلەتيكاعا بارعانىڭ دۇرىس شىعار. تۇركەلەري اقساقالدىڭ اقىل- كەڭەسىن تىڭداپ، ءتالىمىن الساڭ، مۇمكىن باعىڭ اشىلار.
مەن تۇركەلەريدى نە ءۇشىن قۇرمەتتەيمىن؟ «ۇلتى قازاق بالاسىنان جازعى وليمپيادا ويىندارىنىڭ چەمپيونىن باپتاپ وسىرمەي، قازاقستاننان كەتپەيمىن» دەگەن ءسوزى ءۇشىن ارقاما كوتەرۋگە بارمىن. تۇركەلەريدىڭ ىزدەپ جۇرگەن جاس تالانتتارىنىڭ ءبىرى ءوزىڭ شىعارسىڭ، قايرات! اق جول ساعان. قازاقتىڭ اتىن اسقاقتاتۋعا جاراماققا بەل بۋعان ەكەنسىڭ، اللا جولىڭدى وڭعارسىن!
وڭالبەك اۋەلبەكوۆ،
قازاقستاننىڭ حالىق اعارتۋ ىسىنىڭ وزىق قىزمەتكەرى,
الماتى قالاسى.
«ايقىن»
