ب ق و: كۇيشى سەيتەك تارتقان قارا دومبىرا اسىلحان قازيەۆكە اماناتتالدى - فوتو
جالپى، بوكەي ورداسىندا ءوسىپ-ونگەن كۇيشى قازيەۆتەر اۋلەتىن اق جايىق ءوڭىرى جاقسى بىلەدى. ەسەل قازيەۆ سەيتەكتىڭ شاكىرتى ساركەنجە سارسەمبيەۆتەن 100 دەن استام كۇيدى ۇيرەنىپ، الىپ قالعان. تۋىندىنى شەبەر ورىنداۋمەن بىرگە ونىڭ تاريحىن تالماي ايتىپ وتىراتىن ەسەل قاريا سيرەك تارتىلاتىن وتىزعا جۋىق كۇيدى كەيىنگى ۇرپاققا تابىستاپ كەتتى. ونىڭ ۇلى، «قۇرمەت» وردەنىنىڭ يەگەرى، قازاقستاننىڭ ەڭبەك سىڭىرگەن مادەنيەت قىزمەتكەرى ەرمەك قازيەۆتى بۇكىل ەل بىلەدى. كۇيشىلىك ودان ۇلى اسىلحانعا دارىدى.
كەشتى كۇيمەن ادەمى باستاپ بەرگەن ە. قازيەۆ: «مىناۋ قارا دومبىرانى كەزىندە سەيتەك تارتقان. سودان شاكىرتى ساركەنجەدەن مەنىڭ اكەمە قالعان. بۇگىن وسى كيەلى دومبىرانى كوپشىلىكتىڭ كوزىنشە ۇلىم اسىلحانعا امانات ەتەمىن»، دەدى.
كونسەرت بارىسىندا اسىلحان قازيەۆ جەكە دومبىرادا، سونداي-اق داۋلەتكەرەي اتىنداعى وركەسترمەن بىرگە حالىق جانە قازاقستان كومپوزيتورلارىنىڭ كۇيلەرىمەن قاتار وزگە دە تۋىندىلاردى ورىندادى. سونىمەن قاتار زايىبى، «اقجايىق» حالىقتىق ءان-ءبي انسامبلىنە جەتەكشىلىك ەتەتىن اسەل داۋلەتوۆا، سانكت-پەتەربوردا «بالالىق شاق مەيرامى» حالىقارالىق بالالار بايقاۋىندا لاۋرەات اتانىپ ۇلگەرگەن قىزى ايارۋ ءبي بيلەپ، ونەر كورسەتتى.
ورالعا ارنايى كەلگەن دومبىراشىلار، اقتوبەلىك، قازانعاپ اتىنداعى Ⅱرەسپۋبليكالىق «اقجەلەڭ» بايقاۋىنىڭ باس جۇلدەگەرى اسىلبەك كەنەگەسوۆ پەن قازاقستاننىڭ ەڭبەك سىڭىرگەن ءارتىسى، مەملەكەتتىك «دارىن» سىيلىعىنىڭ لاۋرەاتى ايگۇل ۇلكەنبايەۆا كۇي شەرتىپ، كەش مەرەيىن ارتتىرا ءتۇستى. «بۇگىن اتا-بابادان جالعاسىپ كەلە جاتقان قاسيەتتى كۇي ونەرىنىڭ ۇزىلمەي، ماڭگى جاسايتىنىنا كوزىمىز تاعى دا جەتكەندەي بولدى. بولاشاقتا اسىلحاننىڭ ءوز ونەرىن ودان سايىن شىڭداي ءتۇسىپ، قارا دومبىرانى ۇرپاعىنا وسىلايشا اماناتتاپ جاتاتىن ساتىنە دە امان-ەسەن جەتەيىك»، دەدى ا. ۇلكەنبايەۆا.
