قازاقستاندا قىزدى كۇشتەپ الىپ قاشقانى تۋرالى كەسكىن عالامتوردى ءدۇر سىلكىندىردى

استانا. قازاقپارات - عالامتوردا قازاقستانداعى قىز الىپ قاشۋ تۋرالى جاريالانعان ۆيدەو جۇرتشىلىقتى ءدۇر سىلكىندىردى. ءوز ەركىنەن تىس الىپ قاشىپ كەلگەن قىزعا ورامال سالماق بولعاندا، ول جىلاپ، قارسىلىق تانىتقان.

بۇل ۆيدەونى Facebook الەۋمەتتىك جەلىسىندەگى باۋىرجان وردا ەسىمدى «حابار» اگەنتتىگىنىڭ جۋرناليسى جاريالاعان.

ول بۇل ۆيدەونى WhatsApp مەسسەندجەرى ارقىلى العانىن، وقيعانىڭ قاي جەردە بولعانىن انىقتاۋ مۇمكىن بولماعانىن جازادى.

ۆيدەودا اراي ەسىمدى قىزدىڭ كولىكتەن تۇسپەي، باسىنا ورامال سالماق بولعاندا قارسىلىق تانىتقانى بايقالادى. ال ۇلكەندەر جاعى وعان باسۋ ايتىپ، شاشۋ شاشادى. باسىنا ورامال سالىنعان سوڭ، قىز سابىرعا كەلەدى.

ال ءبىراز ۋاقىتتان سوڭ قىز «ۇستاماڭدار، ورامال تاقپايمىن» دەپ، ودان ءارى جىلاي تۇسەدى.

كەيىن كەلىننىڭ بولاشاق ەنەسى «جالعىز سەنى عانا ەمەس، بارلىعىن دا وسىلاي الىپ قاشادى»، - دەپ جۇباتقان.

جەلى قولدانۋشىلارىنىڭ پىكىرىنشە، بۇل وقيعا وڭتۇستىك قازاقستان وبلىسىندا بولۋى مۇمكىن.

Nur.kz