باس ءمۇفتي: ءدىن - ادامگەرشىلىككە، يماندىلىققا، ىزگىلىككە ۇيىتاتىن قۇدىرەتتى كۇش
«ءبىز بۇگىن تەك ەۋرازيا قۇرلىعى ءۇشىن ەمەس، بۇكىل الەم ءۇشىن ماڭىزدى جاعدايلاردى ءسوز ەتكەلى وتىرمىز. ەڭسەلى ەلوردامىزداعى بۇگىنگى كەلەلى كەزدەسۋدە سىزدەردىڭ تاراپتارىڭىزدان ايتىلار پاراساتتى پايىمدار مەن مازمۇندى باياندامالار، ءتۇيىندى تۇجىرىمدار، ءدىنارالىق تاتۋلىق پەن كەلىسىمدى تاعى دا نىعايتا تۇسەدى دەگەن سەنىمدەمىن»، - دەپ باستادى ءسوزىن ەرجان قاجى مايامەروۆ.
وسىدان كەيىن ول ءدىن تۋرالى تۇسىنىككە جان- جاقتى توقتالدى.
«ءدىن ءسوزىنىڭ اياسى كەڭ، ۇعىمى ۇلى. ول قۇدايعا قۇلدىق ۇرىپ، تەك قۇلشىلىقتان باس كوتەرمەۋ دەگەندى بىلدىرمەيدى. ءدىن - ءومىر ءسۇرۋدىڭ ۇزدىك ۇلگىسى، ەكى دۇنيە باقىتىنا جەتەلەيتىن ۇلى جول. ءدىن - ادامگەرشىلىككە، يماندىلىققا، ىزگىلىككە ۇيىتاتىن قۇدىرەتتى كۇش. «اتىمدى ادام قويعان سوڭ، قايتىپ مەن نادان بولايىن»، دەيدى اقىن اباي اتامىز. مىنە، ءدىن دەگەنىمىز ادامدىق قاسيەتتى قالىپتاستىراتىن تەڭدەسسىز تاربيە مەكتەبى»، - دەدى باس ءمۇفتي.
ءدىني باسقارما ءتوراعاسىنىڭ اتاپ وتۋىنشە، ءدىن ءسوزىنىڭ اراب تىلىندەگى ماعىناسى «سىيلىق»، «ۇكىم»، «ەسەپ»، «جازا»، «شاريعات»، «مويىنۇسىنۋ»، «باعىنۋ»، «قۇلشىلىق»، «زاڭ»، «جول» دەگەندى بىلدىرەدى.
«ءدىن - ادامدى اللانىڭ دانالىققا قۇرىلعان تاڭعاجايىپ جاراتىلىسىنان عيبرات الۋعا، ومىردەگى ماقساتى مەن مىندەتىن ايقىنداپ بەرەتىن قۇدايعا قۇلشىلىق ەتۋگە تاربيەلەيتىن ۇلى جول. يسلام ادامعا ەكى دۇنيەنىڭ قۋانىشى مەن سىيىنا، باقىتى مەن بەرەكەتىنە جەتەلەيتىن تۋرا جولدى كورسەتەدى. ادامنىڭ بۇكىل ءومىرىن، امالىن ىزگىلىككە، قايىرىمدىلىققا باعىتتايدى. تاريحتا ءدىنسىز، ياكي، يمانسىز ادام بولعانىمەن، ءدىنسىز قوعام بولماعان. سەبەبى، ادام بالاسى سەنىمگە مۇقتاج»، - دەدى ول.
اۆتور: مارلان جيەمباي
