باتىس قازاقستان وبلىستىق قازاق دراما تەاترى حالىقارالىق فەستيۆالدىڭ باس جۇلدەسىن جەڭىپ الدى - فوتو
قىرىم جەرىندە وسىمەن ون جەتىنشى رەت ۇيىمداستىرىلىپ وتىرعان ايتۋلى دوداعا باتىس قازاقستاندىقتار ەۆريپيدتىڭ «ترويا ارۋلارىمەن» قاتىستى. جيىرما التى ادامنان تۇراتىن توپتى تەاتر ديرەكتورى قۋانىش اماندىقوۆ پەن باس رەجيسسەرى مۇقانعالي تومانوۆ باستاپ باردى.
«ترويا ارۋلارىن» ورال ساحناسىندا تارازدىق بەلگىلى رەجيسسەر، ش. ايتماتوۆ اتىنداعى حالىقارالىق سىيلىقتىڭ لاۋرەاتى قۋاندىق قاسىموۆ بيىل ساحنالاعان بولاتىن.
«ترويا ارۋلارى» تراگەدياسى ءۇشىن باتىس قازاقستاندىق تەاتر اتالمىش فەستيۆالدىڭ باس جۇلدەسى - «بوسپور نيكاسىمەن» ماراپاتتالدى. سونىمەن قاتار گەكۋبا رولىندە ويناعان تەاتر اكتريساسى، قازاقستاننىڭ ەڭبەك سىڭىرگەن قايراتكەرى بيبىگۇل يساليەۆا «ەڭ ۇزدىك ايەل بەينەسى ءۇشىن» اتالىمىمەن ماراپاتتالدى. قازاق تەاتر ونەرىن ءاردايىم جوعارى باعالايتىن رەسەيدىڭ حالىق ءارتىسى الەكساندر گولوبورودكو باستاعان قازىلار القاسى جانە فەستيۆالدى ۇيىمداستىرۋشىلار تاتيانا ۋمريحينا مەن ەلەنا كليمەنكولارعا ريزاشىلىعىمىزدى بىلدىرەمىز»، دەدى قۋانىشتى حاباردى جەتكىزگەن ق. قاسىموۆ.
ەسكە سالا كەتەيىك، باتىس قازاقستاندىق تەاتر بۇدان بۇرىن دا حالىقارالىق، رەسپۋبليكالىق ونەر بايقاۋلارىنا قاتىسىپ، ولجامەن ورالىپ جۇرگەن بولاتىن. اسىرەسە، 2012 - جىلعى قازاندا قوستاناي قالاسىندا ءىلياس وماروۆتىڭ 100 جىلدىعىنا ارنالعان رەسپۋبليكالىق تەاترلار فەستيۆالىندە گريگوري گوريننىڭ «اتىڭ وشكىر گەروستراتىن» (رەجيسسەرى مۇقانعالي تومانوۆ) قويىپ، جەتى بىردەي جۇلدەنى الىپ قايتقان ەدى.
