ميفولوگ-عالىم سەرىكبول قوندىبايدىڭ شىعارماشىلىعىنا ارنالعان كونفەرەنسيا ءوتتى - فوتو

قىزىلوردا. قازاقپارات - ا. توقماعامبەتوۆ اتىنداعى قالالىق مادەنيەت ۇيىندە قازاق ميفولوگياسىنىڭ نەگىزىن سالۋشى عالىم شىعارماشىلىعىنا ارنالعان «سەرىكبول قوندىباي زەرتتەۋلەرىندەگى ۇلتتىق رۋحاني مۇرالاردى جاڭاشا پايىمداۋ ماسەلەلەرى» اتتى رەسپۋبليكالىق عىلىمي-تاجىريبەلىك كونفەرەنسيانىڭ پلەنارلىق ءماجىلىسى ءوتتى.

كونفەرەنسياعا استانا، الماتى، اقتاۋ، اقتوبە قالالارىنان بەلگىلى عالىمدار، قورقىت اتا اتىنداعى  قىزىلوردا مەملەكەتتىك ۋنيۆەرسيتەتىنىڭ وقىتۋشى-پروفەسسورلارى مەن دوكتورانت، ماگيسترانتتار جانە وبلىستىڭ زيالى قاۋىم وكىلدەرى قاتىستى. بۇل تۋرالى ۋنيۆەرسيتەتتىڭ باسپا ءسوز قىزمەتى حابارلادى.

جيىن ماقساتى - قازاق ميفولوگياسىنىڭ نەگىزىن سالعان، سوڭىنا مول مۇرا قالدىرعان ميفولوگ-عالىم سەرىكبول قوندىبايدىڭ شىعارماشىلىعىن زەرتتەۋ جانە ونىڭ الەمدىك جانە وتاندىق مادەني مۇرالارداعى الاتىن ورنىن ايقىنداۋ.

كونفەرەنسيانىڭ اشىلۋ سالتاناتىندا  قىزىلوردا وبلىسىنىڭ اكىمى، ساياسي عىلىمدارىنىڭ دوكتورى قىرىمبەك ەلەۋ ۇلى كوشەربايەۆ قىسقا عانا عۇمىرىن تۋعان حالقىنىڭ رۋحانياتىن كوتەرۋگە ارناپ، ارتىنا قۇندى مۇرا قالدىرا بىلگەن دارا تۇلعانىڭ ەسىمى قاشاندا بۇگىنگى جاستارعا ۇلگى-ونەگە ەكەنىن اتاپ ءوتتى.

سونىمەن بىرگە، قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ رەكتورى، تەحنيكا عىلىمدارىنىڭ دوكتورى، پروفەسسور قىلىشباي الدابەرگەن ۇلى بيسەنوۆ ۋنيۆەرسيتەتتىڭ عىلىمي باعىتتارى اياسىندا سەرىكبول قوندىباي مۇرالارىن جۇيەلى زەرتتەۋ جۇمىستارىن جۇرگىزۋ جوسپارلانىپ وتىرعاندىعىن جەتكىزدى.

س. قوندىباي ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىن گەومورفولوگ ماماندىعى بويىنشا ءتامامداعان. عالىم 1995-جىلى جول اپاتىنا ۇشىراپ، ارباعا تاڭىلسا دا تاعدىرعا مويىماي، تاريح، فولكلور، ميفوگەوگرافيا، لينگۆيستيكا، ارحەولوگيا، ەتنوگرافيانى عىلىمنىڭ كۇردەلى سالاسى ميفولوگيامەن بايلانىستىرا زەرتتەپ، بىرنەشە عىلىمي ەڭبەكتەر جازدى.

كونفەرەنسيا بارىسىندا ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ جەتەكشى عىلىمي قىزمەتكەرى، فيلولوگيا عىلىمدارىنىڭ دوكتورى، پروفەسسور انەس عاريفۋللا قابدولقايىر ۇلى «سەرىكبول قوندىباي ەڭبەكتەرىندەگى ەتيمولوگيالىق بولجامدار»، ق. جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ پروفەسسورى نيەتجان بەرىك ۇلى «سەرىكبولدىڭ قازاق ءدىلى مەن ءتىلى تۋرالى كەيبىر كوزقاراستارى»، قورقىت اتا اتىنداعى ق م ۋ فيلوسوفيا جانە مادەنيەتتانۋ كافەدراسىنىڭ مەڭگەرۋشىسى، فيلوسوفيا عىلىمدارىنىڭ كانديداتى بەرماحانوۆ وڭعار بەرماحان ۇلى «سەرىكبول قوندىبايدىڭ ميفولوگيالىق الەمى» تاقىرىپتارى بويىنشا باياندامالار جاسادى. سونداي-اق وزگە دە عالىمدار ءبىرتۋار ازاماتتىڭ ارتىندا قالعان مول عىلىمي، رۋحاني مۇراسىنا جان-جاقتى تالداۋ جاسادى. سونىمەن بىرگە، كونفەرەنسياعا قاتىسۋشىلار «ۇلت رۋحىن ۇلىقتاعان - سەرىكبول قوندىباي» تاقىرىبىنداعى كورمەمەن تانىستى.

كونفەرەنسيادا قابىلدانعان ۇسىنىمدار بويىنشا الداعى ۋاقىتتا س. قوندىباي مۇراسىن زەرتتەپ-زەردەلەۋگە قاتىستى، عالىمنىڭ ەسىمىن جاستار اراسىندا كەڭىنەن ناسيحاتتاپ، جاس ۇرپاقتى ۇلتجاندىلىققا تاربيەلەۋ باعىتىندا ءبىرقاتار اۋقىمدى جۇمىستار قولعا الىنباق.

اۆتور: ەلۋباي اۋەزوۆ