الماتى وبلىسىنىڭ اكىمى مەن ق ح ر باس كونسۋلى ەكىجاقتى ىنتىماقتاستىق ماسەلەلەرىن تالقىلادى
بۇل تۋرالى وبلىس اكىمىنىڭ باسپا ءسوز قىزمەتىنەن حابارلادى.
كەزدەسۋ بارىسىندا وبلىس باسشىسى اماندىق باتالوۆ ءوڭىردىڭ الەۋمەتتىك- ەكونوميكالىق دامۋ جاعدايى، بولاشاقتاعى دامۋ مۇمكىندىكتەرى مەن قولعا الىنىپ جاتقان ىرگەلى جوبالار تۋرالى باياندادى. سونىڭ ىشىندە قىتايمەن شەكتەسەتىن ايماقتاعى « قورعاس - شىعىس قاقپاسى» ەركىن ەكونوميكالىق ايماعىن قۇرۋ، « قۇرعاق پورت» قۇرىلىسىنىڭ ماڭىزى، قازاقستان- قىتاي بىرلەسكەن كاسىپورىندارىنىڭ ايماق ەكونوميكاسىنا ۇلەسى جايىندا ءسوز قوزعادى. سونىمەن قاتار وبلىستىڭ اۋىل شارۋاشىلىعىن، تۋريزمدى، لوگيستيكانى دامىتۋداعى مۇمكىندىكتەرى جايلى اڭگىمە ءوربىتتى.
ءوز كەزەگىندە جاڭ ۆەي مىرزا الماتى وبلىسى مەن ق ح ر اراسىندا ىنتىماقتاستىقتى دامىتۋ ماقساتىنداعى ۇسىنىستارىن جەتكىزدى. ۇسىنىستار نەگىزىنەن الماتى وبلىسىنىڭ قىتاي ايماقتارىمەن، سونىڭ ىشىندە شىنجاڭ ۇيعىر اۆتونوميالى اۋدانىمەن جانە قازاقستانمەن شەكارالاس ىلە وكرۋگىمەن بايلانىسىن ورناتۋ، ىرگەلى جوبالاردى قولعا الۋ ءۇشىن بيزنەسمەندەردىڭ جۇمىس ىستەۋىنە قولايلى جاعداي جاساپ، كەدەندىك پروتسەدۋرالاردى جەڭىلدەتۋ، گۋمانيتارلىق سالاداعى بايلانىس اۋقىمىن كەڭەيتۋ، ءتۋريزمدى دامىتۋ ماقساتىندا تۋريستىك جارمەڭكەلەر، پرەزەنتاتسيالار، بيزنەس- فورۋمدار وتكىزۋ تۋرالى بولدى.
وبلىس اكىمى ا. باتالوۆ جالپى ەكى تاراپتىڭ دا الەۋمەتتىك- ەكونوميكالىق دامۋى تۇرعىسىنان ءوز تيىمدىلىگىن كورسەتەتىن بۇل ۇسىنىستاردى قولدايتىندىعىن ايتىپ، قازاقستان جانە ق ح ر پرەزيدەنتتەرىنىڭ باستاماسىمەن قولعا الىنعان « نۇرلى جول» باعدارلاماسى مەن « جىبەك جولىن» جاڭعىرتۋ جوبالارىن ساپالى ورىنداۋ باعىتىندا ىنتىماقتاسا جۇمىس ىستەۋگە نيەت ءبىلدىردى. جانە جاڭ ۆەي مىرزا ارقىلى جەتكىزىلگەن ىلە وكرۋگى باسشىسىنىڭ ارىپتەستىك شاقىرتۋىن قابىل الاتىنىن، ول ساپاردى الداعى ۋاقىتقا جوسپارلايتىنىن دا اتاپ ءوتتى.
كەزدەسۋ سوڭىندا قوس تاراپ ءبىر- بىرىنە ەستەلىك سىيلىقتار تابىستادى.
