راۆيل گاينۋتدين: يسلام لاڭكەستىك مەملەكەتى بولۋى مۇمكىن ەمەس، سەبەبى يسلام - بەيبىتشىلىك ءدىنى

استانا. قازاقپارات - يسلام لاڭكەستىك مەملەكەتى بولۋى مۇمكىن ەمەس، سەبەبى يسلام بەيبىتشىلىك ءدىنى بولىپ تابىلادى.

بۇل تۋرالى بۇگىن استانادا الەمدىك جانە ءداستۇرلى دىندەر كوشباسشىلارىنىڭ V سيەزىنەن كەيىن «قازاقپارات» تىلشىسىنە بەرگەن سۇحباتىندا ر ف مۇسىلماندارى رۋحاني باسقارماسىنىڭ ءتوراعاسى، ءمۇفتي راۆيل گاينۋتدين ءمالىم ەتتى.

«ەگەر دە يسلام ءدىنىن جامىلىپ لاڭكەستىك اكتىلەرى جاسالىپ جاتسا، بۇل اسىل ءدىنىمىز - يسلامعا قايشا. يسلام لاڭكەستىك مەملەكەتى بولۋى مۇمكىن ەمەس. يسلام - بەيبىتشىلىك ءدىنى. بۇگىندە بۇل جايىندا دۇنيەجۇزىلىك يسلام ليگاسى مەن الەمنىڭ 57 مەملەكەتىن بىرىكتىرىپ وتىرعان يسلام ىنتىماقتاستىعى ۇيىمى باس حاتشىلىعى اتىنان دا مالىمدەلدى»، - دەدى ر. گاينۋتدين.

وسى ورايدا ول الەمدىك جانە ءداستۇرلى دىندەر كوشباسشىلارىنىڭ سيەزى سەكىلدى پىكىر الماسۋ الاڭدارىندا ساياساتكەرلەر مەن ءدىني قايراتكەرلەردىڭ قاجەتتى بىرلەسكەن كۇش- جىگەرىن قابىلداپ، «يسلام مەملەكەتى» جوق ەكەنىن بارىنشا مالىمدەۋ كەرەكتىگىن قاداپ ايتتى.

«يسلام لاڭكەستىكتى ناسيحاتتامايدى، قالالار مەن ەلدى مەكەندەردى جانە تاريحي، مادەني ەسكەرتكىشتەردى بۇزۋدى تالاپ ەتپەيدى. ءبىز جاراتۋشى يەمىز، قاسيەتتى قۇران، پايعامبارىمىز ءبىزدى بەيبىتشىلىكتى تاراتۋعا شاقىراتىنىن ءتۇسىنۋىمىز كەرەك»، - دەدى ر ف مۇسىلماندارى رۋحاني باسقارماسىنىڭ ءتوراعاسى.

اۆتور: رۋسلان عابباسوۆ