ن. نازاربايەۆ پەن پان گي مۋن الەمدىك جانە ءداستۇرلى دىندەر ليدەرلەرى سيەزىنىڭ جۇمىسىن تالقىلادى
بۇل تۋرالى اقوردانىڭ باسپا ءسوز قىزمەتىنەن حابارلادى.
كەزدەسۋ بارىسىندا نۇرسۇلتان نازاربايەۆ پەن پان گي مۋن ءوتىپ جاتقان الەمدىك جانە ءداستۇرلى دىندەر ليدەرلەرى سيەزىنىڭ جۇمىسىن تالقىلادى جانە ىنتىماقتاستىقتى ودان ءارى نىعايتۋ جولدارىن قاراستىردى.
قازاقستان پرەزيدەنتى باس حاتشىنىڭ سيەزد جۇمىسىنا قاتىسۋى ءىس- شارانىڭ ماڭىزىن ايتارلىقتاي ارتتىرا تۇسەتىنىنە نازار اۋداردى.
«ءسىز ەكونوميكا مەن ساياساتقا، كونفەسسياارالىق ماسەلەلەرگە قاتىستى الماعايىپ كەزەڭ ورىن العان قازىرگى شاقتاعى جۇمىس باستىلىعىڭىزعا، ب ۇ ۇ- نىڭ 70 جىلدىعىنا دايىندىق جۇمىستارى ءجۇرىپ جاتقانىنا قاراماستان ءبىزدىڭ ەلىمىزگە كەلىپ وتىرسىز. سونىمەن قاتار، ءسىز يادرولىق پوليگوندى جابۋ جونىندەگى باستامامىزدى قولدادىڭىز. 29 - تامىز يادرولىق سىناقتارعا قارسى حالىقارالىق ءىس- قيمىل كۇنى رەتىندە اتاپ وتىلەدى. قازاقستان بۇگىنگىدەي فورۋمدار وتكىزۋ ارقىلى جەر بەتىندە بەيبىتشىلىك ورناتۋ ىسىنە ءوز ۇلەسىن قوسىپ كەلەدى دەپ ەسەپتەيمىن»، - دەدى مەملەكەت باسشىسى.
پان گي مۋن الەمدىك دىندەر كوشباسشىلارى جينالعان وسىنداي ماڭىزدى ءىس- شاراعا قاتىسۋعا شاقىرعانى ءۇشىن نۇرسۇلتان نازاربايەۆقا العىس ايتتى.
«ءسىزدىڭ كورەگەندىگىڭىزدى جانە قازىر اسا ماڭىزدى بولىپ وتىرعان وسى سيەزدى شاقىرۋ جونىندەگى باستاماڭىزدى لايىقتى باعالاۋعا ءتيىسپىن. ءسىز بۇل باستامانى 15 جىل بۇرىن، جاعداي قازىرگىدەن مۇلدە باسقاشا بولعان تۇستا كوتەردىڭىز. بۇگىندە بۇكىل الەم ءدىني ەكسترەميزمنەن جانە لاڭكەستىكتەن زارداپ شەگىپ جاتقاندا وشپەندىلىككە قارسى تۇرۋعا شاقىرعان ءدىني كوشباسشىلاردىڭ قاتارى كوبەيگەنى جانە ءۇنى بارشاعا جەتەرلىكتەي بولعانى قاجەت»، - دەدى ب ۇ ۇ باس حاتشىسى.
