ءبىر جىل، ءبىر اي، ءبىر كۇندە تۋعان قوس ءدۇلدۇل ەل الدىندا ەسەپ بەردى
ايتىس ونەرىندە ايشىقتى ءىز قالدىرعان قازاقتىڭ قوس اقىن قىزىنا وڭتۇستىك جۇرتشىلىعىنىڭ ىقىلاسى ەرەكشە. انا تىلىمىزدىڭ ابىرويىن اسقاقتاتىپ، ۇلتتىق ونەردىڭ ءورىسىن كەڭەيتۋ جولىنداعى ولشەۋسىز ەڭبەكتەرىڭىزدى ەل ايرىقشا باعالايدى. ءبىر جىل، ءبىر اي، ءبىر كۇندە دۇنيە ەسىگىن اشقان قوس ءدۇلدۇل ورتاق مەرەيتويى وتىرار تورىنەن باستالدى.
توي شىمىلدىعى وتكەن جۇمادا اۋداندىق مادەنيەت ۇيىندە وتكەن «حالقى قادىرلەگەن قوس اقىن» اتتى شىعارماشىلىق كەشپەن ءتۇرىلدى.
سونىمەن بىرگە، اسەلحان الىشەر قىزىنىڭ باسپادان جارىق كورگەن «ساحاردا تۇردىم، سەنى ىزدەپ» اتتى جاڭا جيناعىنىڭ تۇساۋكەسەرى ءوتتى. كەشتى وسى ءوڭىردىڭ پەرزەنتى، بەلگىلى ساتيريك كوپەن امىربەك جۇرگىزىپ وتىردى.
كەشكە وبلىس اكىمىنىڭ ورىنباسارى ساكەن قانىبەكوۆ ءوڭىر باسشىسىنىڭ جۇرەكجاردى قۇتتىقتاۋىن وقىپ، ىزگى تىلەككە تولى قۇتتىقتاۋدان سوڭ قوس اقىننىڭ يىعىنا زەرلى قامزول جابىلىپ، ارنايى سىيلىقتار تابىس ەتىلدى.
توي سالتاناتىندا اۋدان اكىمى سالىحان بولاتوۆ كوپشىلىككە ق ر پارلامەنتى سەناتىنىڭ دەپۋتاتى قۋانىش ايتاحانوۆتىڭ ىستىق ىقىلاسقا تولى قۇتتىقتاۋ حاتىن جەتكىزدى. وسى وتىرار جەرىنىڭ تاعى ءبىر قادىرلى پەرزەنتى، حالىقارالىق «قازاق ءتىلى» قوعامىنىڭ پرەزيدەنتى، اكادەميك ءومىرزاق ايتبايەۆ ونەردە دە، ومىردە دە جۇپتارى جازىلماعان اسەلحان مەن ءاسيانىڭ تۋعان تىلدىڭ تۇعىرىن بيىكتەتۋدەگى سۇبەلى ەڭبەكتەرىن اتاپ، كەۋدەلەرىنە «انا ءتىلى» توسبەلگىسىن تاقتى.
بەلگىلى زاڭگەر، «جەتى جارعى» جانە «قوجابەرگەن جىراۋ» قوعامدىق قورىنىڭ ءتوراعاسى بەكەت تۇرعارايەۆ ءسوز قۇدىرەتىن تەرەڭ ءتۇسىنىپ، ۇلتتىق ونەردى ۇلىقتاپ جۇرگەن ەكى قارىنداسىنا يگى تىلەگىن ارناپ، سىي-سياپات جاسادى. مۇنان سوڭ وبلىستىق «وڭتۇستىك قازاقستان» گازەتىنىڭ ديرەكتور-باس رەداكتورى اباي بالاجان قۋانىش يەلەرىنە قۇتتىقتاۋ لەبىزىن جەتكىزىپ، ەستەلىك سىيلىقتار تابىس ەتتى. كەش بارىسىندا مەرەيتوي يەلەرى كوپشىلىكتى جاڭا جىرلارىمەن سۋسىنداتتى.
ايمان اقەدىل قىزى
Kazaitys.kz
