باتىر ارۋلار بايقاۋىنىڭ جەڭىمپازدارى تانكى استىندا تاپجىلماي جاتۋ سىناعىنان مۇدىرمەي ءوتتى - فوتو

استانا. قازاقپارات - تانكى استىندا تاپجىلماي جاتۋ، كەدەرگىلەر جولاعىن ەڭسەرۋ، جاۋىنگەرلىك قارۋدان وق اتۋ - مۇنىڭ بارلىعى «باتىر ارۋلار» بايقاۋى جەڭىمپازدارىنىڭ جاۋىنگەرلىك دايارلىعىن تەكسەرۋدىڭ تاعى ءبىر كەزەڭى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.

بۇل جولى پوليگونعا قاتىسۋشى قاتارداعى جاۋىنگەر لۋنارا بايمۇحامەتوۆا، اعا لەيتەنانت ءاليا حايرۋللينا، كىشى سەرجانت سالتانات عابدوللاشيەۆا، سەرجانت بايان جاپاروۆا، كىشى سەرجانت بوتاگوز مۇسايەۆا مەن ءمادينا امانجولوۆا، ەفرەيتور اسەم سەحيمبايەۆا جانە اعا لەيتەنانت بوتا قورابايەۆا اتتاندى.

جاۋىنگەرلىك سىناقتار اسۋىنان وتكەننەن كەيىن ولار قازاقستان قارۋلى كۇشتەرى اسكەري قىزمەتشىلەرىنىڭ جاۋىنگەرلىك ازىرلىك دەڭگەيىنە سايكەس كەلۋىن راستاۋى ءتيىس. بايقاۋعا قاتىسۋشىلارعا اتىس قارۋى ۇلگىلەرىنىڭ ينجەنەرلىك ءبىلۋىن جانە وق اتۋ داعدىسىن، جاۋىنگەرلىك جاراقتى اسىنىپ كەدەرگىلەر جولاعىن ەڭسەرۋ كەزىندەگى توزىمدىلىكتى، «كوبرا» بروندى ماشيناسىن باسقارۋ شەبەرلىگىن كورسەتۋ قاجەت بولدى.

قىزدار ءۇشىن ەڭ كۇردەلى سىناق ول تانكى استىندا تاپجىماي جاتۋ بولدى. بۇل جاتتىعۋ اسكەري قىزمەتشىلەردىڭ پسيحولوگيالىق دايىندىعىن تەكسەرەدى. الايدا، «باتىر ارۋلار» جەڭىمپازدارى قوبالجۋعا قاراماستان، قر قك ناعىز اسكەري قىزمەتشىلەرى رەتىندە بۇل سىناقتان دا مۇدىرمەي ءوتتى.

ەسكە سالا كەتسەك، ق ر قورعانىس مينيسترلىگى قىز-كەلىنشەك اسكەري قىزمەتشىلەر اراسىندا «باتىر ارۋلار» بايقاۋىن ۇيىمداستىردى. سايىستىڭ جوسپارى بويىنشا ون ەكى قىز-كەلىنشەكتىڭ ءارقايسىسى 2016 -جىلعا ارنالعان ارنايى كۇنتىزبەنىڭ بەلگىلى ءبىر ايىنىڭ پاراقتارىن كوركەيتە تۇسپەك. بارلىق جەڭىمپازدار جاۋىنگەرلىك دايارلىقتى وتكەننەن كەيىن، ولاردى كاسىبي ستيليستەردىڭ بەت-الپەتتى ارلەۋى جانە فوتوسەسسيا كۇتىپ تۇر.