سەمەيدەگى شاشتاراز بولمەسىنەن شىققان جىلان تۇرعىنداردى قاتتى شوشىتتى

استانا. قازاقپارات - سەمەيدە شاشتارازدىڭ بىرىنەن يرەلەڭدەگەن تىرشىلىك يەسى تابىلدى. تۇرعىندار العاشقىدا ابدىراپ قالعانىمەن، سوڭىنان ونىڭ ايبات شەكپەيتىنىن بايقاعان.

ءتىپتى قولدارىنا الىپ سۋرەتكە دە تۇسكەن، دەپ حابارلايدى 24.kz.

سوعان قاراعاندا، بۇل جاقىندا قالاعا گاسترولدىك ساپارمەن كەلىپ كەتكەن زووباققا تيەسىلى بولۋى مۇمكىن دەگەن جورامال بار. شاشتاراز قىزمەتكەرلەرى توتەنشە جاعدايلار باسقارماسىنا حابارلاسقان. ونداعى ماماندار بۇل جاعدايعا الاڭدايتىن نەگىز جوق دەپ سەندىردى.

«112 نومىرىنە قوڭىراۋ شالىپ، جىلان ۇستاپ العاندارىن ايتىپ، حابارلاستى. شۇعىل تۇردە وقيعا ورنىنا باردىق. وكىنىشكە قاراي، باۋىرىمەن جورعالاۋشىنىڭ قاي تۇقىمعا جاتاتىنىن انىقتاۋ مۇمكىن بولمادى. بىزدە ونداي ماماندار جوق. جىلاندى قالا سىرتىنا شىعارىپ، ادامداردان الىس جاققا، ورمانعا جىبەردىك. قالا بويىنشا بۇعان ۇقساس باسقا وقيعا تىركەلگەن جوق»، - دەيدى قالالىق توتەنشە جاعداي باسقارماسىنىڭ مامانى قىمبات كوپبايەۆ.