ەلىمىزدە تۇرعىن ءۇي ارزانداسادا، ساتىپ الۋشى ازايدى
باسپا ءسوز قىزمەتىنىڭ مالىمەتىنشە، 2015 -جىلى مامىردا تۇرعىن ءۇيدى ساتىپ الۋ- ساتۋدىڭ تىركەلگەن مامىلەلەرىنىڭ سانى 12342 بولدى. بۇل كورسەتكىش وتكەن ايمەن سالىستىرعاندا 19,8 پايىزعا تومەن.
ايتا كەتەيىك، 2015 -جىلدىڭ ءساۋىر ايىندا تۇرعىن ءۇيدى ساتىپ الۋ مەن ساتۋعا بايلانىستى تىركەلگەن مامىلەلەردىڭ سانى 15397 بولدى، بۇل كورسەتكىش ناۋرىز ايىمەن سالىستىرعاندا 33,4 پايىزعا ارتىق بولعان ەدى.
«مامىر ايىندا تۇرعىن ءۇيدى ساتىپ الۋ- ساتۋ بويىنشا تىركەلگەن مامىلەلەردىڭ سانى جاعىنان كوشباسىندا قاراعاندى وبلىسى - 1374، ودان كەيىنگى ورىندا - استانا قالاسى - 1350، شىعىس قازاقستان - 1161، وڭتۇستىك قازاقستان - 1075، الماتى قالاسى - 1047 جانە الماتى وبلىسى تۇر - 1041»، - دەلىنگەن حابارلامادا.
ايتا كەتەيىك، قازاقستاندا مامىردا تۇرعىن ءۇي نارىعىنداعى باعانىڭ وزگەرۋى بايقالدى. مامىردا وتكەن ايمەن سالىستىرعاندا جاڭا تۇرعىن ۇيلەردى ساتۋ باعالارى 1,4 پايىزعا، اباتتاندىرىلعان تۇرعىن ۇيلەردى الىپ ساتۋ 0,1 پايىزعا تومەندەدى، ال اباتتاندىرىلعان تۇرعىن ءۇيدى جالعا الۋ تولەمى 0,3 پايىزعا ءوستى.
ەسكە سالا كەتەيىك، بۇعان دەيىن قازاقستاندىق قايتالاما نارىقتا پاتەرلەردىڭ ارزانداعانى حابارلانعان بولاتىن. سونىمەن قاتار، جاڭا سالىنعان ۇيلەردەگى پاتەرلەردىڭ دە باعاسى ءتۇستى. ءبىر ايدىڭ ىشىندە ورتاشا باعا 0,2 پايىزعا، ياعني ءار شارشى مەتر 225084 تەڭگەگە دەيىن تومەندەدى.
